euskalkultura.eus

Trenque Lauquen, Argentina. Martxoaren 12an, etzi larunbatean, hain zuzen, hasiko dira euskara klaseak 'Euskal Sustraiak' euskal etxean. Alejandra Bengochea irakasle, eskolak larunbatero izango dira, arratsaldeko 3etik 7etara. Hitzordua, ikasten jarraitu nahi duten ikasleentzat zein zerotik hasiko direnentzat ere dago zuzenduta.

“Batzuetan zaila egiten zaio jendeari astegunetan klaseetara etortzeko denbora toaptzea; hori dela eta aurten kurtso guztiak larunbatetan izango dira”, azaldu dio Alejandra Bengocheak EuskalKultura.com-i. “Adin guztietako lagunek har dezakete parte klaseetan. Aurten gainera, hizkuntza irakasteaz gain, Euskal Herriko historiari buruzko gai nagusiak ere sartuko ditugu programan”, adierazi du irakasleak.

Gernikako Bonbardaketa eta San Fermin

Beste alde batetik, apirilaren 26an 'Euskal Sustraiak' euskal etxeko kideek Gernikako Bonbardaketaren urteurrena gogoratuko dute egoitzako balio anitzeko aretoan. Gustavo Rinaldi herriko pintoreak Picassoren Gernika koadroaren kopia bat egin du euskal etxeko hormetan jartzeko. “Aretoa oraindik bukatuta ez egon arren, erabiltzeko moduan dago. Etxeko balio anitzeko aretoan jarriko dugu Rinaldik margotutako koadroa eta apirilaren 26an desestaliko da. Omenaldiaren ondoren pintxo batzuk konpartituko ditugu kide eta lagunen artean”, jakinarazi dute Trenque Lauquengoek.

Datorren hilean ere, eta udalak gonbidaturik, 'Euskal Sustraiak'ek Trenque Lauquen-en urteurrenean hartuko du parte. Ikurrinaren koloreekin, bertako euskaldunek euskal gizataldearen presentzia bermatuko dute herriko jaian.

Etorkizunari begira, maiatzean euskal etxearen urtebetetzea ospatuko dute 'Euskal Sustraiak'eko kideek eta uztailean Koldo Zabalondo arotzaren bisita jasoko dute. Zabalondok hitzaldi bat eskainiko du San Fermin ekitaldiaren testuinguruan.