euskalkultura.eus

Bilbo, Bizkaia. Kherau bostkote bizkaitarrak bigarren diskoa kaleratu du, "Aukhera" lana eta bertan euskal folklorearen tradizioa berritzen eta munduko hainbat musika eta estiloekin nahasten dihardute musikagileek. Denetarik dago diskoan: musika klasiko apur bat (Isiltasun Ituna kantuan), erritmo balkanikoak (Transilv-arin), Italiako doinuak (Arin in dantza), rock progresiboa (Orreaga), edo metala (Salbatzaile). Horien guztien artean kantu batek bereziki deitu digu atentzioa guri: Nevada izeneko abestiak. 

Taldeko kide Iker Lope de Bergarak argitu digu kontua. "Aitzakia da gure arbasoak Nevada joan behar izan zutela. Eta ez dakigu orduko euskal exodoa ez ote dan berriz ere gertatuko", esan du. Taldeak Diasporarekin harreman zuzena du, ez familiakoa, baina bai adiskideena. "Taldeko batzuk izanak dira Nevadan. Alex, esaterako, Boiseko Jaialdian izan zen Galdakaoko Andra Mari dantza taldearekin. Eta nik duela urte batzuk Buenos Aireseko Eusketxerekin proiektu bat egin nuen. barakaldoko zortzi lagun joan ginen hara, akelarrei buruzko lantegiak ematera".

Kopla berriak Diasporari jarriak

Nevada kantuak Ameriketara artzain joandakoen ahotsa dakar, baina ikuspuntu berri batetik: alaba jaioberria Euskal Herrian utzi behar izan duen aitarena. Musika ere berezia da, Ikerrek dioskunaren arabera: "Musika hurbildu egin nahi izan dugu tematika horretara. Oesteko jota bat egiten saiatu gara. Ez hango musika, ez hemengoa, baizik eta erdipuntuko zerbait". 

Abestia entzuteko jo hona. Bertan irakur daitezke letrak, euskaraz, ingelesez, frantsesez eta gaztelaniaz. Diskoa osoa entzun edo erosteko, hona.