euskalkultura.eus

Rosario, Argentina. Gregorio Lizarbe Valentziako Ador herrian jaio zen, aita nafarra zuela, eta 18 urterekin heldu zen Argentinako Rosario hirira. Anaia bat, Fernando izenekoa, frankistek fusilatu zuten Gasteizen, "Menos Franco, más pan blanco" idazteagatik. Ahizpa, Felisa Lizarbe, Valentzian bizi da, eta familiak senitartekoak ditu Nafarroan ere.

Rosarion Isabel Rodriguezekin ezkondu zen eta hiru seme-alaba izan zituzten: Marisa, Silvia eta Fernando. Rosarioko Nafar Etxeko kide egin ziren Gregorio eta bere aita (Gregorio izenekoa ere, Andosillan jaioa). Zendu berriak lan eskerga egin zuen bizitza osoan aurten mendeurrena betetzen duen erakunde honen alde, eta elkarteko idazkari eta lehendakaria ere izan zen, besteak beste. 

Lizarbe sarri bueltatu zen Nafarroara, eta harro zegoen bidaia horietako batean San Fermineko entzierroan parte hartu izanaz. Nafar Etxean itzal handia utzi du, Argentinan nafar nortasuna bizirik mantentzeko egin zuen lan gogoangarriagatik.

Fernando semearen hitzetan "gizaseme batek izan ditzakeen ezaugarririk preziatuenak zituen: apaltasuna, zintzotasuna, kemena eta lan egiteko gogo bizia. Horiek guztiek gurekin jarraituko dute, bere hutsunea zinez nabaritu arren".