NABOk osoko kide gisa onartu du joan den asteburuan San Frantziskon Miamiko Euskal Etxea

2010/02/15

Miamiko Euskal Etxeko ikuspegia elkarteko ekitaldi batean, artxiboko irudian (argazkia EuskalKultura.com)

PUBLIZITATEA

NABOk osoko kide gisa onartu du Miamiko Euskal Etxea joan den larunbatean South San Frantziskoko Euskal Kultur Etxean egindako bilkuran. Egun Florida estatuko euskal etxe bakarra da Miamikoa. Kidetzak dakartzan eskubideak dagoeneko indarrean badaude ere, datorren uztailean NABOk Idahoko Boisen egingo duen Biltzarrean aurkeztuko da Miamiko Euskal Etxea Estatu Batuetako eta Kanadako bere lankideen aurrean. Lehenengo aldia da hau Floridako euskal etxe bat NABOra bildu eta AEBetako gainerako euskal etxeekin koordinatuta lanean hasi izan dena. NABOk berrogei kide baino gehiago biltzen ditu egun, guztiak AEBetakoak, Kanadako bi salbu.

Miami, Estatu Batuak. Poztasuna eta aldi berean engaiamendu maila latuago bat dira Miamiko Euskal Etxeko bazkideen artean albistea hedatu zenean gailendu ziren iruzkinak. Gauza berria da hau bertako euskaldunentzat, baina ardura sentitzearekin batera zalantzarik ez dago aurrera begira zenbait ate ere irekiko dizkiela pauso berri honek.

Miamiko Euskal Etxeko lehendakariorde eta ohiko eledun/komunikatzaile den Boni Guenecheak, bere gurari eta agiantza adierazi zituen "berri on honek balio izan dezan geuk geure konpromisua indartu eta lotura estuagoak sor ditzagun komunitatearekin, areagotuz geure ekintzak eta presentzia Florida hegoaldean".

Dagoeneko Miamiko Euskal Etxea hasia da euskara eskolak ematen, NABOn Martin Goikoetxea (Wyoming) buru eta Izaskun Kortazar (Idaho) koordinatzaile tekniko lanean diharduen Euskara Adarra medio, HABE lankide.

Lehenengo aldia da Floridako euskal etxe bat NABOko kide izatea eskatu eta federazioko partaide bihurtu dena. Estatu Batuetako ekialdean hiru euskal etxe --New York, Washington DC eta orain Miami--, kultur elkarte bat --Society of Basque Studies in America (SBSA)-- eta Kanadako Quebec-eko Euskaldunak euskal etxea dira orain NABOko partaide. Gainerakoak mendebalderago daude, gehienak Kalifornian.

Azken komentarioak