euskalkultura.eus

euskal diaspora eta kultura

Albisteak rss

Munduan Euskara eta Euskal Kultura ikasketen unibertsitate-eskaintza duten hiriei gehituko zaie Tokio

2014/07/28

Liburua japonieraz Euskarari eta Euskal Herriari buruz, Hagio Sho eta Hironi Yoshida japoniar euskaltzaleek idatzita
Liburua japonieraz Euskarari eta Euskal Herriari buruz, Hagio Sho eta Hironi Yoshida japoniar euskaltzaleek idatzita

PUBLIZITATEA

Tokioko Atzerriko Ikasketen Unibertsitateak akordioa sinatuko du Etxepare Institutuarekin 2015etik aurrera Euskara eta Euskal Kultura irakurletza berria zabal dadin hiriburu japoniarrean. Hitzarmenari esker, Unibertsitateak 'School of International and Area Studies' eta 'School of Language and Culture Studies' fakultateetan euskal hizkuntza, kultura, gizarte eta historiako ikasketei ekiteko konpromisoa hartuko du. Tokiokoarekin, datorren urtean Euskara eta Euskal Kultura mundi osoko 17 herrialdetako 34 unibertsitatetan irakatsiko dira, 27 irakurleren eskutik.

Donostia-San Sebastian. Egoitza Donostian duela Euskara eta Euskal Kultura eta kulturgileak nazioartean kokatzen laguntzea helburu duen institutuak ohar batean adierazi duenez, ipar hemisferioko neguan sinatuko den hitzarmenari esker, unibertsitateak japoniarreko School of International and Area Studies eta School of Language and Culture Studies fakultateetan euskal hizkuntza, kultura, gizarte eta historiako ikasketei ekiteko konpromisoa hartuko du. 

Gainera, lizentziako eta graduondoko ikasketen programetan sartuko ditu ikasketok, bai eta antzeko maila eta iraupeneko ikastaroei dagokien kreditu kopuru bera eman ere. Ikasketa horiek sustatzeko jarduera akademikoak eta ikerketarekin lotutakoak ere antolatuko ditu unibertsitateak, hala nola, mintegiak, hitzaldiak, solasak, sinposioak, etab. 

Tokioko Atzerriko Ikasketen Unibertsitatearen xedea munduko hizkuntzak eta kulturak irakastea da, modu teoriko zein praktikoan, bai eta haiei buruzko ikerketa sustatzea. Nazioarte mailako kultur elkarlana bultzatzea eta, hizkuntza oinarri hartuta, munduko herri berriei buruzko ezagutzan sakontzea du helburu nagusi. 50 hizkuntza inguru irakasten dituzte bertan, beste hainbati buruz ikertzeaz gain. 

Irakurletza berriaren albistea baliatuta, Etxepare Euskal Institutuak eskerrona adierazi nahi izan die aspalditik Japonian euskal kultura ezagutzera ematen diharduten eta Institutuaren laguntzaile estimatuak diren Sho Hagio, Nami Kaneko eta Hiromi Yoshida japoniar euskaldun ezagunei, amaitu du oharra Etxeparek.



« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia