euskalkultura.eus

Necochea, Argentina. Hiru hilabete eman dituzte Necochean Mondragon Unibertsitateko Humanitate eta Hezkuntza Zientzien Fakultateko hiru ikaslek bertako Ikastola eskolan praktikan egiten. Lehen mailako irakaskuntzan aritu dira hiru gazteak, Ikastolak eta Unibertsitateak sinatutako hitzarmen bati esker, Mondragon Unibertsitateak lehen mailako praktikak atzerrian egiteko aukera bultzatzen baitu.

Hitzarmenaren baitan, eta 2013ko ikasturteko azken hiruhilekoan, Maider Etxarri Errekondo usurbildarrak, Ane Amiano Frago azpeitiarrak eta Teresa Martin Martikorena gasteiztarrak lehen mailako kurtsoetan jardun dute, 6 eta 12 urte arteko neska-mutilekin hain zuzen. Teresa Martinen kasuan, ingeles irakasle gauzatu ditu praktikak. Irakaslegaien esanetan “oso esperientzia polita izan da eta nahiz eta metodologian ezberdintasun batzuekin topatu, ez dugu arazorik izan moldatzeko. Umeei dagokienez, Euskal Herrikoak baino bihurriagoak dira baina aldi berean karinosoagoak”. 

[Hauek eta beste iritzi batzuk eman zituzten neska euskaldunek klaseko azken egunean hiriko telebista kate batek egindako elkarrizketa batean. Eelkarrizketa ikusteko, klik hemen]

Necochean egin duten egonaldian, bertako euskal etxearen hainbat ekitalditan ere hartu dute parte Maiderrek, Anek eta Teresak. Besteak beste, Euzko Etxea-ko ordezkaritzako parte joan ziren azaroan  Cordobako Villa Mariara, 2013ko Argentinako Euskal Aste Nazionala barru barrutik bizitzera.

[Praktikak egiteaz gain Argentinako euskal diaspora ezagutzeko aukera ere izan dute ikasle euskaldunek. Azaro hastapenean Euskal Astean izan ziren Necocheako euskal etxeko kideekin batera (argazkiaEE)]

Gogora dezagun Necocheako Ikastolak 2008an abiatu zuela lehen mailako zikloa eta urtero joan dela kurtso bat emendatzen, zikloko kurtso guztiak eskaintzera iritsi arte. Hau bukatuta bigarren zikloa irakasteari ekingo dio 2014ean.

“Praktika hauek egin ahal izana oso garrantzitsua izan da irakasleentzat eta baita sustatzaile izan garen itsasoz bi aldeotako bi erakundeentzat ere, Ikastola eta Unibertsitatea alegia. Etorkizunari begira, beraz, elkarren arteko proiektu gehiago gauzatu ahal izatea espero dugu”, adierazi digu Xabier Zubillagak.