euskalkultura.eus

Guadalajara, Mexiko. Euskal idazle eta argitaletxeek Guadalajaran euskal literatura ezagutarazteko hainbat ekimen egiten ari dira Guadalajarako Liburu Azokan. Euskal standean 12 euskal argitaletxe euren liburuak ari dira aurkezten, eta Anjel Lertxundi idazle euskaldunak (Orio, 1948) “Los trapos sucios”, 'Etxeko Hautsa' eleberriaren itzulpena, ekarri du azokara. Asteartean “Los lectores presentan” atalean hiru mexikar irakurlek eleberriaren berri eman zuten eta publikoa euskal literaturan sakontzera animatu nahi izan zuten.

“Los trapos sucios”  liburuak ETAren “biolentzia politikoaren” munduan sartzen den gazte nerabe baten istorioa kontatzen du, nahiz eta amaieran, ETAren beraren biktima bihurtzen den nolabait. Protagonistaren aita berriz, administrazio frankistako kide izandakoa, Alzheimerrak jota dago, eta semeak aitorpen bat egitea erabakitzen du. Topaketan Lertxundiz gain bere editorea, Jorge Gimenez, eta Etxepare Institutuko Euskara Sustapenerako zuzendaria, Mari Jose Olaziregi, izan ziren.

Politika ere hausnarketa-gai izan zen aurkezpenean, eta bere ustez ETAk “jarduera armatua behin-betiko amaitzea” zergatik erabaki ote duen galdetu zitzaionean, Lertxundik adierazi zuen, bere ikuspuntutik begiratuta “konponbide polizialek gutxitan konpontzen dituztela arazo sozialak”. Idazlearen ustetan, “gizartea nazkatu izanak” ekarri du biolentziaren amaiera. “Gizartea mobilizatu
izan ez balitz, nazkatuta “nahikoa da” esan izan ez balu, ez zen amaitu den bezala amaituko”.

Fernando Aranburu, Tusquets Sariaren irabazle

Azokan beste euskal idazle bat ere izan zen protagonista izan zen, han bertan jakin baitzen Fernando Aranburuk (Donostia, 1959) irabazi duela Eleberri Editoreen VII Tusquets Saria, “Años Lentos” liburuarekin. Juan Marsé lehendakari zuen epaimahaiak asteastean jakinarazi zuen bere erabakia.  Almudena Grandes, Juan Gabriel Vasques, Rafael Reig eta Beatriz de Moura ziren gainontzeko
epaimahaikideak.