euskalkultura.eus

euskal diaspora eta kultura

Albisteak rss

Mattin Etchamendy-k bere bizitza euskal amerikarrari buruzko liburua aurkeztu zuen atzo Ezterenzubin

2013/09/10

Ezker-eskuin lehen lerroan: Ezterenzubiko auzapeza, Luzien Etxezaharreta Maiatz-eko arduraduna eta, mikroa eskuetan, Mattin Etchamendy 'Urruneko Mendebaldean artzain' liburua aurkezten Ezterenzubin (argazkia EuskalKultura.com)
Ezker-eskuin lehen lerroan: Ezterenzubiko auzapeza, Luzien Etxezaharreta Maiatz-eko arduraduna eta, mikroa eskuetan, Mattin Etchamendy 'Urruneko Mendebaldean artzain' liburua aurkezten Ezterenzubin (argazkia EuskalKultura.com)

PUBLIZITATEA

Ezterenzubin (Nafarroa Beherea) sortu baina arras urte gehiagoz Estatu Batuetan bizia den Mattin Etchamendy euskal-amerikarrak bere ibilbidea kontatzen duen "Urruneko Mendebalean artzain" liburu autobiografikoa aurkeztu zuen atzo bere sorterrian, Estatu Batuetatik Euskal Herriari eta bere euskal erroei egiten dien ekarpen garrantzitsu gisa. Etxeko euskara eder eta bizian idatzia, liburuak Mattinen istorioarekin batera, burua eta izaera Diasporaren eta Euskal Herriaren artean banatuta bizi diren beste hamaika euskal emigranteen sentipen eta egoeren lekuko ere bada. Gaur arratsaldeko 6:30etan Baionako Euskal Erakustokian mintzatuko da Mattin Etchamendy, eta hilaren 20ean liburuak sinatuko ditu Donibane Garaziko Kukuxka liburudendan.

Ezterenzubi, Nafarroa Beherea. Ezterenzubiko bestak izan dira ondarreko egunetan eta horien barne iragan astelehena baliatu du Mattin Etchamendy Ameriketan bizi den herritarrak "Urruneko Mendebebalean artzain" liburua aurkezteko. Bere bizi aberatsa kondatzen du Mattinek liburuan, Ezterenzubin hasi eta Kalifornia eta Arizonako mendi eta basamortuetaraino luzatzen dena, euskara ederrean kondatu ere, zinez gomendagarria den liburuan. 

Gogoan behar da atxiki Mattin Etchamendy Ezterenzubin sortu zela 1939an eta 1961an, aitzinetik bere haurride eta familiako zenbaitek egin bezala Ameriketara joan zela artzain eta geroztik han errotua dela. Bidaia batean Euskal Herrian Maitexa baztandarra ezaguturik, harekin ezkondu eta senar-emazteak egun familia euskal amerikar baten aitama eta aitatxi-amatxi dira Kaliforniako Bakersfield-en.

Aurkezpena Ezterenzubiko ezker paretan egin zen eta herriko alkateak, Luzien Etxezaharreta Maiatz argitaletxeko arduradunak, Joseba Etxarri EuskalKultura.com-eko zuzendari eta liburuaren aitzin-solasa egin duenak eta Mattin Etchamendy egileak berak hartu zuten parte.

Gaur bertan, asteartea, eta liburuaren haritik, aurkezpen berri bat eta hitzaldia emanen du Baionan, bertako Euskal Erakustokian, Mattin Etchamendyk. Aldi berean, ez da ahantzi behar buruilaren 21ean artzain amerikanoen bazkari eta egunpasa handia eginen dela Donibane Garazin. Eta bezperan, 20an, arratseko 6etarik goiti, artzaineri loturiko liburuak izenpetzen izanen direla hiru egile Kukuxka liburudendan (3, Zitadela karrikan): Mattin Etchamendy bera, Philippe Etchegoihen idauze-menditarra eta Gaby Etchebarne aldudarra. Ekitaldia eta hor eskainiko den hurrupaldia ere zabalik eta libro dira.



« aurrekoa
hurrengoa »

Erlazionatutakoak

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia