Londresko Euskal Etxeak agiria plazaratu du Garikoitz Ibarluzea bazkidearen atxiloketa dela eta

2010/03/16

Londres erdigunean ari omen zen lanean aspaldidanik Garikoitz Ibarluzea

PUBLIZITATEA

Londresko Basque Society-Euskal Elkarteak agiria plazaratu zuen atzo astelehena, poliziak bertako bazkide den Garikoitz Ibarluzearen atxiloketa dela-eta. Agiriak argitzen du igandean Londresen Garikoitz Ibarluzea atxiloketaren berri izan zutela, "indarkeria politikoko karguak leporatuta". "Argitu nahi dugu lehenik eta behin Garikoitz Euskal Elkartearen laguna eta bazkidea dela, baita London erdialdeko janari-denda bateko enplegatu urte luzez jardun duela ere, eta hori guztia aski ezaguna eta publikoa da pixka bat ezagutzen dugun edonorentzat", adierazten du Euskal Elkarteko Koordinazio Batzordeak sinatzen duen idazkiak.

Londres, Ingalaterra. Bigarren puntuan, "Elkarteak albistearekin guztiz harrituta dagoela" adierazten du, "zentzuzkoa denez nahigabetuta dago berriarekin eta ez daki ezer, leporatu zaizkion karguei buruz. Elkarteak kezkaz ikusten du halaber gertaera hauek piztu ditzaketen zalantza eta errezeloak eta garbi eta garden jokatu nahi du betiere, ahaztu gabe gure helburuak zein diren: euskal kultura bultzatzea, euskal jendeari Londonen laguntza ematea, baita euskal herritarren zein gure kultura eta gizarteari buruzko interesa agertzen duen edonoren topagune izatea ere".

Azkenik, Euskal Etxeak deialdia luzatu zien bere bazkide eta lagunei, atzo bertan arratsaldeko 7etan egingo zen bilerara (Euskal Elkartearen Oxford Houseko lokalean egitekoa), "argibideak izan, zalantzak argitu edo Garikoitzen egoeraren berri jakin nahi duen edonorentzat", amaitzen da oharra.

-Preso, Espainiaren esku utziko duten erabaki arte (Berria)
-Vivía con su propia identidad (El Correo)
-Detenido hasta que se celebra la vista (Gara)

----------------------

EGUNERAKETA 2010/03/16 17:13

Londresko Euskal Elkarteko Koordinazio Batzordeak atzoko bilkuran zabaldu agiria:

Iragarri bezala, atzo bilera bat egin genuen Oxford Houseko Chapelean Garikoitz Ibarluzearen atxiloketa dela eta. 20 bat pertsona bertarartu ginen eta, informazio-saioan, email-kontu bat sortzea erabaki zen (freedomforgari@googlemail.com) Garikoitzen kasuaren edo hurrengo asteetan izango diren elkartasun-ekitaldien berri jaso nahi duen edonorentzat. Mesedez, interesik baduzu, zuzendu email-kontu horretara izena emateko. Eskerrik asko arretagatik eta laster arte.

Euskal Elkarteko Koordinazio Batzordea