euskalkultura.eus

Lima, Peru. Iragan martxoaren 30ean heldu zen Limara Bizkaiko Foru Aldundiak eta 30 bat enpresa bizkaitarren ordezkariek osatutako merkataritza bidaia Perura. Bidaiaren helburua herrialde honetan Bizkaiko enpresentzako negozio-bideak eta bertako enpresekin harremanak sustatzea zen.

Bizkaiko ordezkaritzaren buru Imanol Pradales Ekonomia Sustatzeko diputatua izan zen, eta berarekin batera bidaian parte hartu zuten, besteak beste, Gorka Esteves, Gabino Martínez de Arenaza, José María Bilbao, eta Bilboko Merkataritza Ganberako Mikel Arrieta eta José Luis Gil. 

Harrera Euskal Etxean

Bidaiariei harrera abegikorra egin zieten Limako euskaldunek, euskal etxeko ateak irekiz. Bertara bildu ziren elkarteko bazkide eta zuzendaritza kideak, eta baita Limako zenbait euskaldun ere. Ekitaldian Bizkaiko goi mailako sukaldariek eginiko pintxoak jateko aukera izan zuten, eta Bizkaiko txakolina eta Arabar Errioxako ardoa ere dastagai izan ziren.

Imanol Pradalesek harreragatik esker ona erakutsi zuen eta Bizkaiko Foru Aldundiaren jatorri eta ezaugarrien berri eman zuen, Bizkaiak Perurekin duen harremana azpimarratuz. Jarraian, Euskaletxeko presidente Raúl Noblecillak gai honetan sakondu zuen, euskaldunek Perun izan duten eragina aipatuz. "Hitzaldiak txalo ugari jaso zituzten eta bertara bildu zirenek 'Gora Bizkaia, Gora Euskadi, Gora el Perú' ohikatuz amaitu zuten ekitaldia", agertu dute euskal etxeko iturriek.

Amaitzeko opari trukaketa egin zen: Imanol Pradalesek makila bana oparitu zien ADEX erakundeko presidente Eduardo Amorrorturi eta euskal etxeko presidenteari, bidaia antolatzen eskainitako babesa eta lankidetza eskertzeko. Bilerak lagunarteko giroan jarraitu zuen, Bermeoko musikari bikoak alaituta.

Enpresariekin bilerak 

Ordezkaritzak Peruko agintari eta enpresariekin bilera ugari egin zituen Limako egonaldian. Besteak beste Peruko Ekonomia eta Finantza arloko ministroekin eta Limako Alkateordearekin bildu ziren; hala nola politika eta enpresa arloko hainbat ordezkariekin.

Horrez gain, apirilaren batean ADEX-en egoitzan egin zen ekitaldi batean parte hartu zuten. Bertan, Foru Aldundiak euskal enpresei buruzko aurkezpena egin zuen, euren teknologia eta berrikuntza maila azalduz. Jarraian beste hizlari eta adituek bi herrialdeen arteko negozio bideak eta aukerak aztertu zituzten.

Amaiera afaria

Foru Aldundiaren merkataritza bidaiari amaiera emateko afaria egin zen Limako  Country Club-ean, bertako enpresari eta agintariekin. Menua Bizkaiko goi mailako sukaldariek prestatu zuten: José Miguel Olazabalaga, Fernando Marina, Mikel Población eta Josu Ibarrak; Garaizabal enologoak aukeratutako Bizkaiko Txakoli eta Arabako Errioxa ardoarekin.

Imanol Pradales diputatuak hitz batzuk egin zituen, anfitrioiei eta Peruko enpresariei eginiko harrera beroa eskertzeko. Bidaiaren balioespen baikorra ere egin zuen Pradalesek. Bitxikeria moduan aipatu zuen afariaren gune gisa Country Club aukeratzea Euskal Etxeari omenaldia izan zela, bertan sortu baitzen Limako euskal elkartea 1950ean.