euskalkultura.eus

Iruñea-Pamplona. Berria, heriotza gertatu eta gutxira hasi zen atzo zabaltzen, telefono-deiak, internet eta sare sozialak tarteko. Eguberri egunean gertatua, kolpea handiagoa izan zen erabat tupustekoa eta esperogabea izateagatik, Leire eta bere familia oso pertsona ezagun eta apreziatuak zirelako, eta emakume gaztea zelako, 38 urte besterik baitzituen. Amaya Zenarutzabeitia berri txarraren igorle izan zen, honela azaldurik egun et'erdi lehenago hasitako ameskaiztoaren genesia: "inongo eritasunik zeukanaren jakitun izan gabe, astelehenean Leire aldibereko hemorragiak izaten hasi zen eta Iruñeko Ospitalean sartu zuten, lehenengo batean, eta berehala eztakit zenbait presazko ebakuntza egin behar izan zizkioten egoera larri hori zerk eragiten zuen jakin eta bideratu nahian".

[Leire Leunda Viscarret (argazkia Irantzu Leunda Biskarret)]

Amayak dioenez, "lehenengo analisiak aski etsigarriak izan ziren, osolaren osagai guztiak minimoetan baitzeuden, bereziki plaketak : 'Ez zeukan plaketarik, Amaya', esaten zidan sofrikarioan zen Bakartxok (Leireren amak) negar-zotinka. 'Gelditu gabe odol-poltsak eta suero-botilak ipintzen aritu izan zaizkio, baina odol jarioak segitzen zuen'. Atzo (herenegun) arratsaldean, medikuek larriena gainditu ahal izan zutela pentsatu zuten eta Leirek gaina hartu eta honetatik aterako zela".

Alabaina asteazkeneko 6:30etan familiari abisatu zioten Leire egoera kritikoan zegoela. "Bakartxo zaintza intentsibo unitatean sartu da (bertan euki dute Leire astelehenetik guztiz lasaigarripetua) azken aldiz ikusi eta despeditzeko. Hamar minutu geroago hil da. Gaurko (herenegun) goizeko 7ak ziren".

Atzo bertako arratsaldeko seietatik aurrera bere gorpuaren beila egin zen Burlatako Irache beilatokian. Errausketa gaur osteguna goizeko 11etan egingo da. Euskal-venezuelar jator, dantzari, hango eta hemengo komunitateetako pertsona aktibo, langile eta emana zen, eta  Gaztemunduko partaide ohi eta beste hamaika gauzarekin aurkez daitekeen Leireren aldeko elizkizunak gaur arratsaldeko zazpi t'erdietan egingo dira Burlatako San Blas elizan. Caracasen arratsaldeko sei et'erdietan egingo da meza, Manzanares elizan.

Lerro hauen bidez bihoazkie gure besarkada sendoa eta doluminik zintzoenak Joseba eta Bakartxo gurasoei, Irantzu eta Izaskun ahizpei eta gainerako familiari, baita ugari zeuzkan lagunei eta euskal-venezuelar familiako eta Diaspora osoan ezagun eta lagun zutenei. GB.

-Obituarioa gaztelaniaz Deian