euskalkultura.eus

Rio Gallegos, Argentina. Gaztea da oso Hegoalde Argentinarra Euskal Etxea eta gaztetasunaren bizkortasunarekin lan egiten du Euskal Herriko kultura zabaltzearen alde. Herriko komunitateari begira proposamen batzuk dauzka abian Rios Gallegoseko euskal erakundeak, baina dirubilketa ekimenei dagokienez, ezagunenetakoa Euskal Herrira joateko bi txartelen zozketa izango da seguruenik.

Iazko zozketari dagokionez, joan den apirilean, Aberri Egunaren testuinguruan, gauzatu da, eta Patagoniako lagunek adierazi dutenez “euskaldunen erara ospatu dugu: pintxo onak janez eta kalimotxoa edanez”. 118. zenbakiarekin El Calafateko Juan Cruz Iglesias izan zen irabazle zoriontsua. Iglesiasek hegazkin tiketak jasotzeaz gain mila euro dirutan, bidaia gastuetarako ere hartu du euskal etxetik.

Bitartean, beste ekintza batzuk ere garatzen ari da euskal etxea, tartean gitarra klaseak eta zeramika tailerra. Duela gutxi, Borja Blazquez-en bisita jaso dute San Cruzeko euskaldunek eta sukaldari donostiarraren eskutik sukaldaritzaren misterioetan murgildu ziren.

Euskal etxearen urtemuga

Uztailean euskal etxearen urtebetetzea ospatu ohi dute Hegoalde Argentinarra-ko lagunek. Lau urte egin dira aurten nortasun juridikoa lortu dutenetik eta nahiz eta jaia atzeratu behar izan, joan den igandean euskal etxearen omenez ere jaso zen Argentinako bandera herriko San Martin plazan. Euskal etxeko ordezkariak presente izan ziren zeremonian.