euskalkultura.eus

Bartzelona, Katalunia. Bartzelonako Euskal Etxea elkarteko Txokoan lan egingo duen pertsona baten bila ari da. Pertsona hau bai barran bai sukaldean ariko da eta beharrezkoa da ahozko euskara maila ona izatea. Era berean, aintzat hartuko da ahozko katalan maila ona izatea, elkartearen ezagutza, elkarteko kide izatea eta lehendik barran eta sukaldean lan egin izana.

Elkartea ekimena eta motibazioa duen pertsona baten bila ari da, lantaldean lan egiteko gai dena. 18 orduko lan jardunaldia eskaintzen du, 500 euroko soldata garbiarekin. Kontratua 2013ko ekainaren 30a arte izango da. Interesdunek kurrikuluma otsailaren 4a baino lehen bidali behar dute txokoa@euskaletxeak.org helbidera.

Nobela beltza

Bestalde, gaurtik hasi eta otsailak 9a bitartean, Bartzelonan BCNegra 2013 nobela beltzari buruzko jaialdia egingo da. Jaialdiaren barruan zenbait euskal idazle izango dira datorren astean hirian. Hasteko, Bartzelonan izango da astelehenean Dolores Redondo donostiarra, azkenaldian hautsak arrotzen ari den "El guardián invisible" eleberriaren egilea. 

Asteazkenean, otsailak 6an, Jon Arretxe, Jose Javier Abasolo eta Felix Modroño idazleek euskal nobela beltzari buruzko mahai inguruan parte hartuko dute. Eztabaidaren izenburua "Bilbao. La sombra del Guggeheim es alargada" izango da, La Capellan (Carrer del’Hospital, 56). 

Jarraian, idazleak Bartzelonako Euskal Etxean izango dira, arratsaldeko zortzietan, bertan ere, euskal literaturaz zein beraien argitalpenez luze eta zabal hitz egiteko. Arretxek "19 kamera" eleberri beltza argitaratu du eta Abasoloren azken lanak "La luz muerta" izenburua du.