euskalkultura.eus

Iruñea-Pamplona. Migel Sanz buru duen gobernuak plazaratutako oharrean argitzen denez, erabakia Alberto Catalan nafar exekutiboko Erakundeekiko Harremanetarako kontseilaria eta Gobernuaren eleduna --eta irailaren 30etik aurrera baita Hezkuntza kontseilaria ere eta, beraz, Euskarabideko arduraduna-- denak eta Argentinako Nafar Etxeen Federazioko presidente Crisanto Ayanzek adostu dute elkarrekin egindako bilera batean, Ayanz ekimen horretako elkarte antolatzaileko ordezkari denez gero.

Biek bat eginda adierazi dutenez  komenigarria zen 1987tik hona Buenos Aires, Rosario, Mar del Plata, Bolivar eta Mendozako bafar etxe argentinarrak eta Txileko Nafar Etxea elkarretaratu dituen hitzordu hori aurtengoz atzeratzea, krisialdi ekonomikoak horretara bultzatuta.

'Segitzen du gainerako ekimenekiko konpromisoak'

Neurri honekin Nafarroako Gobernuak lehentasunak ezarri nahi dizkie etxe hauekiko daramatzan egitarau eta ekimenei, "honek Foru Komunitateko tradizio, kultura eta errealitatearekiko duen konpromisoan aldaketarik ez dakarrelarik, estimu handia aitortzen baitie Argentina eta Txileko nafarrei herrialde hauei heien garapen ekonomiko eta sozialean eginiko ekarpenengatik".

Catalan kontseilariak kanpoko nafar emigranteen dedikazio eta ahalegina eskertu du eta animoak eman dizkie, jarrai dezaten euren jatorriko lurrarekiko harremana eta lokarriak sustatzeko ekimenak bultzatzen, azaltzen du Nafarroako Gobernuaren oharrak.