euskalkultura.eus

Resistencia, Argentina. 'Kotoiaren Lurra' Euskal Etxe chacotarrak Resistencia hiriaren sorreraren 136. urteurrenean parte hartu zuen, elkarteko iturriek EuskalKultura.com-i jakinarazi diotenez. Hiria 1878ko otsailaren 2an sortu zuten Italiako Fliuli erregiotik Argentinara etorritako immigranteek.

Hiriko udalak (Intendentziak) antolatu zituen urteurreneko ospakizunak eta Aida Ayala alkateak (Intendenteak) hartu zuen parte bertan, hiriko zenbait gizatalderekin batera (euskaldunak, italiarrak, greziarrak, paraguaitarrak eta kroaziarrak).

[Kotoiaren Lurra Euskal Etxeko ordezkariak taulagainean Resistencia hiriaren 136. urteurreneko ikuskizunean (argazkia Chaco EE)]

Ekitaldiak Rio Negro ibaian egin lehorreratzearekin hasi ziren eta ondoren ikuskizuna egin zen 2 de Febrero parkearen anfiteatroan, hiriaren sorreraren historia azalduz. Kotoiaren Lurra Euskal Etxearen ordezkariak bertan izan ziren, ikurrinarekin.