euskalkultura.eus

Ondarroa, Bizkaia. Kirmen Uriberen 'Bilbao-New York-Bilbao' eleberria Japonian argitaratu berri du Tokyoko Hakusui Sha argitaletxeak eta datorren astean idazlea bertan izango da bere lana aurkezteko. Azaroaren 6an aurkeztuko da liburua, Tokyoko University of Foreign Studies unibertsitatean egingo den ekitaldiarekin. Uriberekin batera, Ryuta Imafuku irakaslea eta Nami Kaneko, liburuaren itzultzailea, egongo dira eta idazketaz, literaturaz eta hizkuntzetaz mintzatuko dira.

Hurrengo egunean, Tokyoko Cervantes Institututuan, Keijiro Suga idazlearekin batera irakurraldia egingo du Uribek, eleberriaren pasarteak irakurriz. Ekitaldia arratsaldeko zazpietan izango da. Bidaia honetako azken ekitaldia azaroaren 9an egingo da, Okinawa irlan. Uribek bertako poetekin topaketa batean parte hartuko du, Okinawako Unibertsitatean.

Oso hurbil

Bidaian abiatu aurretik, japoniar idazleak eta irakurleak aurrez aurre ezagutzeko irrika duela aitortu dio Uribek EuskalKultura.com-i. Eleberriaren itzulpen prozesuan Nami Kaneko itzultzailearekin harreman estua izan zuen Uribek --euskaratik zuzenean itzuli du Kaneko liburua-- eta honek, Euskal Herria eta Japonia hain urrun izanagatik, liburuan japoniarrek erraz uler ditzaketen gaiak daudela agertu omen dio.

"Eurek ere bere burua ikusten omen dute hor, arrantzaleen bizimoduan, galtzen ari den bizimodu horretan. Oso hurbil sentitzen dute", esan du Uribek. Japoniar idazleen aldetik euskararekiko eta liburuarekin interesa nabaritzen ari dela dio ondarroarrak eta horrek beraiekin biltzeko gogo bizia sortu diola onartu du.

Bidaiaren ekitaldi berezienetakoa, zihurrenik, Okinawa irlan egingo den topaketa izango da. "Okinawa toki berezia da, han beste hizkuntza bat dute eta gerraren itzala handia da oraindik ere. Tradizioa mantentzen jakin dute eta tradizio horri oso lotuak daude". Munduko bi muturretakoak izanik ere, unibertsitateko topaketan izango dute elkarri zeresanik Okinawako poetek eta idazle ondarroarrak.