euskalkultura.eus

Sao Paulo, Brasil. EuskalKultura.com-ek gaur bertan argitara eman duen beste albiste batean, HABEren 'Euskara Munduan' egitasmoko koordinatzaile den Kinku Zinkunegiren berri ematen da, euskara irakasle eta HABEko teknikari den Zinkunegi Argentinako Rosarion baitabil egunotan, iragan larunbatetik aurrera hiri hartako Zazpirak Bat Euskal Etxean egiten ari den 'Neguko Barnetegi'an ari baita parte hartzen, Brasil, Txile, Argentina eta Uruguaiko 32 ikasle/irakasle ikastaro egile. Argentinara heldu aurretik, baina, Brasildik pasatu zen Zinkunegi, Sao Pauloko Eusko-Brasildar Etxetik gogora ekarri digutenez, eta hitzaldia eman zuen bertako Cervantes Institutuko auditorium-ean, euskararen egungo egoera hizpide.

Oskar Goitia buru duen euskal etxe saopaulotarretik dioskutenez, hitzaldia eman zuen uztailaren 16an HABEko teknikariak Sao Pauloko Cervantes Institutuan, euskararen egungo egoerari buruz eta sortu ere interes handia sortu zuen, solasaldi bizi eta argigarria erdietsiz eta bertaratutakoen galdera ugari eraginez. Ekitaldiaren ostean ziurtagiriak banatu zitzaizkien parte hartu zutenei eta, guztiaren ondotik, euretako talde handiska batek pintxo-potea egin zuen.

Gogora dezagun 'pintxo-potea' Euskadiko hainbat herri eta hirietan indarra hartzen ari den 'poteo' mota dela. Partaideak tabernaz-taberna joaten dira, leku bakoitzean pintxo eta pote bana hartuz, normalean prezio apaletan. Ikus Sao Paulon aurretik eginiko pintxo-potea, hemen.