Kepa Etchandy euskal argazkilariaren “Amerikanuak” liburua Buenos Airesko Liburu Azokan aurkeztuko da

2014/03/24

"Amerikanuak" liburuaren azala

PUBLIZITATEA

Egileak berak aurkeztuko du liburua Buenos Airesko Nazioarteko Liburu Azokaren 40. Edizioan. “Amerikanuak” Amerikanuek, -hau da, Amerikan diru dezente egin zuten eta gero euren herrietara bueltatu ziren euskaldunak- eraikitako baserrien argazki eta kontakizunen bilduma da. Argentinako egonaldian, gainera ‘Buenos Airesek Euskal Herria ospatzen du’ delako jaian hartuko du parte Kepa Etchandy argazkilariak eta euskal etxe batzuk bisitatuko ditu, bere lanak erakusteko asmoz. Buenos Aireseko Liburu Azoka apirilaren 24tik maiatzaren 12ra arte luzatuko da aurten.

Buenos Aires, Argentina. “Amerikanuak” Kepa Etchandy argazkilari baionarrak egindako argazki bilduma da. Liburua Roberto Landaburu idazle argentinarrari esker eskuratu ahal izango da Argentinan berak egin baitu Rosarioko AMALEVI argitaletxean ehun aleko tirada.

Liburuaren sorreraz, Landaburuk berak azaltzen duenez, “Keparekin (Etchandy) batera Iparraldeko herrixkak bisitatu nituenean berak erakusten zidan bereziki zeintzuk ziren Amerikanuen etxe eta baserriak. Argazkiak egin ahala, lekuen historiak kontatzen zizkidan eta nik pentsatzen nuen informazio hori ezin zela galdu. Horregatik animatu nuen liburua argitaratzeko. Eta azkenean egin du”.

“Amerikanuak” lanari dagokionez, euskarri nagusia irudiak badira ere, irudiak ulertzen laguntzen duten testuak ere dakartza. Hala ere, eta editoreak adierazten duen bezala, liburuaren asmoa ez da gaiari buruzko ikerketa sakona izatea: “XIX. eta XX. mendeetan Amerikara etorri zen euskal emigrazioarena oso gai garrantzitsua eta zabala da. Liburuak, ordea, argazkilari batek hartutako irudi –eta ahots- batzuk baino ez ditu proposatzen”. Jakina denez, Amerikanuen aztarnak bai Iparralde bai Hegoaldeko herrietan aurki daitezke.

Euskal Herriko standean aurkeztuko du Kepa Etchandyk “Amerikanuak” liburua apirilean hasiko den Buenos Aireseko Liburu Azokan (data baieztatzeke). Baina bere egonaldia aprobetxatuz beste ekintza batzuetan ere hartuko du parte argazkilari baionarrak, hala nola, maiatzaren 11an hiriburuko Mayo Etorbidean egingo den ‘Buenos Airesek Euskal Herria ospatzen du’ jaialdian. Bere asmoa ere bada euskal etxe batzuk bisitatzea.

Kepa Etchandy-ren argazkiak ikusteko, klik hemen.