euskalkultura.eus

Madril, Espainia. Julio Elejalde --Athleticeko jokalaria izan zen garai batean-- urtarrilaren 24az geroztik da Madrilgo Euskal Etxeko lehendakari. Hasi berri-berria da, beraz, ardura zuzen horretan. EuskalKultura.com-ek bere agintaldiari buruz galdetu dio, lehentasunei buruz eta asmo berriez. Erantzuna, bera aurreko Zuzendaritza Batzordeko kide zenez, idazkaria baitzen, gehienbat kudeaketa haren segida izango dela berea erantzun du.

Lehentasunen artean, ordea, gazteak erakartzeko ahalegin berezia aipatu du, eta kultur arloan, programazio egonkorra lortzen saiatuko dela, "ikuskizunak, aurkezpenak, hitzaldiak eta emanaldiak antolatuz, hilabetean zehar, data jakinetan, kopurua eta maiztasuna ere zehazteke". Ideiak direla azaltzen du, gainerako batzordekideekin, bazkideekin eta Euskal Herritik ere etor daitezkeen proposamenak bildu nahi baititu.

Horri dagokionez, EuskalKultura.com-ek lerro hauen bidez eskaintzen dion aukera baliatu nahi du Euskal Herriko edo Diasporako idazle, musikari, kantari, sortzaile eta abarrei, eta oro har espainiar hiriburuan euren burua aurkeztu nahi dutenei, kontutan har dezaten Euskal Etxea aukera bat dela jauzi hori egiteko, euren egoitza den eraikina oso leku egokian baitago Madrilen, erdigunean, Zarzuelako Antzokiaren aurrean, eta euskal kulturari eta oro har euskaldunei laguntzea euren lan eta helburuetakoa dela Madrilgo Euskal Etxe gisa.

Madrilgo Euskal Etxearengana jotzeko, aski da internet bidez euren webgunean sartzea, www.euskaletxea-madrid.com, edo telefonoz (34) 915 314 593 zenbakira deitzea.