Jose Christian Echavarriak Kotoiaren Lurraren zuzendaritzan emandako hamar urteen balioespena egin du

2010/10/05

Lan taldea: eserita Ezequiel, Amanda, Marianela, Oscar Nelson, Iliana Luz, Emilio, Sandra, Marta, Margarita eta Angelita; zutik Cesar Usal eta Jose Echavarria (argazkia ChacoEE)

PUBLIZITATEA

Chacoko Kotoiaren Lurra Euskal Etxearen zuzendaritzan hamar urte eman igaro ondoren Jose Christian Echavarria bazkideak bere esperientzia aberatsaren balioespena egin eta EuskalKultura.com-en bitartez Diasporako lagunekin partekatu nahi izan du. Fabio Echarrik hartu du bere lekukoa elkartearen zuzendaritzan eta hasiak dira jada sasoi berriko ekimenak, tartean Cesar Arrondo historialariaren hitzaldi bat.

Chaco, Argentina. Jose Christian Echavarria Chacoko 'Kotoiaren Lurra' Euskal Etxearen zuzendaritzako kide izan da azken hamar urtetan. Denbora horretan euskal kulturaren aldeko lan eskerga egina da, elkarteko ekimen desberdinak aurrera ateratzeko ilusioa eta ahalegina batuz. Bere eta euskal etxeko kideen lana eta engaiamenduaren emaitza dira Aurrera Goaz antzerki taldea, dantza taldea, euskara ikastaroak, Arkaitz Mendoza pianojoleak Resistencian eman zuen kontzertu jendetsua.... Euskalkultura.com-i zuzenduriko gutunean ekimen hauek eta beste asko ekartzen ditu gogora Jose Echavarriak (gutun osoa gazteleraz irakurtzeko, jo hona).

Lan asko, eta oroitzapenak ezinhobeak: Chacoko euskal kultura suspertzen ikustearen poza, Argentinako euskal etxeetan eginiko ehundaka lagunak, Euskal Asteetako dantza emanaldien emozioa, Txile eta Australiako euskal komunitateak ezagutzeko aukera... Eta tartean, Euskalkultura.com-entzako lerro batzuk, Diasporako berriak zabalduz egiten dugun lana eskertuz. Milesker zuri, Jose, milesker zuei, kontatzeko zer emateagatik!

Cesar Arrondren hitzaldia

Bestalde, aipatu, zuzendaritza berria, Fabio Echarriren gidaritzapean, lanean hasi dela jada eta lehen ekimenak egin dituela. Horietako bat izan zen joan den irailaren 24ean Cesar Arrondo historialariak Resistencia hiriko ‘Bernardino Rivadavia’ Liburutegian eman zuen hitzaldia, 'Euskal Nazioaren historia' izenburupean.

Hitzaldia 'Kotoiaren Lurra’ euskal etxeak antolatua zen, FEVA, Argentinako Euskal Etxeen Federazioaren babesarekin.