euskalkultura.eus

New York, AEB. Eliza eta piratak, ezta ez edonolako konpainia Joanes baleazaleak dakarrena "The Basque Whaler" trilogiaren hirugarren eta azken atalean. Aurreko biak bezala, Renoko Unibertsitateko Center for Basque Studies-ek argitaratu du, ingelesez. Liburuak euskal baleazaleek XVI. mendean Ternua aldean bizi izan zuten abenturaren testigantza dakar; beti ere, Guillermo Zubiaga marrazkilariaren ikuspegitik.

Fantasia eta baleazaleen historia uztartzen dituen komikiaren hirugarren ale honetan eliza eta piratak ere agertzen dira. Egileak azaltzen duenez, elizak baleazaleen industriarekin lotura izan zuen eta, esaterako, Baionako katedrala industria honetako diruarekin eraiki zen. Protagonistaren izenari dagokionez, "historia erregistroetan, baleazale eremuetan eta zenbait euskal mitoetan ugari errepikatzen den izena da Joanes, horregatik aproposena zela pentsatu nuen hasieratik", esan dio Zubiagak EuskalKultura.com-i.

[Komikiaren pasarte bat]

Anti-heroia

Halarik ere, euskal baleazaleak beste iturri 'klasiko' batzuetatik ere hartu ditu ezaugarriak: "txiki-txikitatik nire pertsonaia gogokoenak anti-heroiak izan dira beti. Esate baterako, Star Wars-eko Han Solo, X-Men-go Wolverine, Clint Eastwood-ek antzeztutako Harry Zikina eta Sergio Leonek sortutako spaghetti-western-etako izenik gabeko gizona", dio komikilariak.

Joanes-en hirugarren atalaren narratiban beste eragin batzuk ere aipatzen ditu egileak: "literatura klasikoko zenbait pasartek eragina izan dute, adibidez, François Rabelais-en Pantagruel, Gottfried August Bürger-en Munchausen Baroia eta, nola ez, Walt Disney-ren Pinocchio". Atarrabiren kondairari ere keinu egiten dio komikiak, eta, "anti-heroiaren gaiarekin jarraituz, Lope Agirreren esaldi ezagun bat erabiltzen da", gehitu du Zubiagak.

[Eliza, piratak eta baleazaleak agertzen dira Joanes komikiaren hirugarren atal honetan]

Munduan zehar

Komikia Renoko Unibertsitatearen webgunean salgai dago, baina azaroan egingo da aurkezpen ofiziala, New Yorken. Zubiagaren esanetan, abentura izan da eleberri grafiko hau egitea, baina "egunduko saria da Joanes Estatu Batuetan euskal gai bati buruz egin den aurreneko komikia -eta momentuz bakarra-izatea".

Komikiaren aurreko bi atalak --"The Flying Whaleboat" eta "Whale Island"-- munduan zehar saldu dira: AEB, Euskal Herria, Espainia, Frantzia, Islandia, Finlandia, Quebec, Italia eta Argentina, besteak beste. Orain, trilogia amaituta, Joanes Euskal Herrian eta euskaraz argitaratzen saiatuko da Zubiaga.

Komikia erosteko jo Renoko Center For Basque Studies-en liburuen katalogora. 

Egileak sinatutako alea (edo ale pertsonalizatua) nahi baduzu, idatzi e-maila hona: gzubiaga@verizon.net.