euskalkultura.eus

Mexiko DF, Mexiko. Josu Ruiz de Gordejuela ikerlari arabarraren liburuak harrera ona izan du Mexikon, bertako euskal komunitateak idazlearen aurkezpenei eskainitako babesak erakutsi duen bezala.  Idazleak ekainaren 5ean egin zuen lehen aurkezpena, México DFko Centro Cultural de España aretoan. Berarekin batera bi gonbidatuk ere hartu zuten parte ekitaldian: Cristina Torales Pacheco,  Universidad Iberoamericana-ko Historia irakaslea, eta José María Urkia Etxabe, Euskalerriaren Adiskideen Elkarteko Gipuzkoako lehendakaria.

[Ezkerretik eskubira Cristina Torales Pacheco irakaslea,  Josu Ruiz de Gordejuela eta José María Urkia Etxabe]

[Josu Ruiz de Gordejuelak (eskubian) lagun euskal mexikar asko agurtzeko aukera izan zuen aurkezpenean]

[Euskal idazle eta ikertzaileak bere azken lanaren aleak sinatu zituen (argazkiak VascosMexico.com)]

Mazatlanen eta DFko Euskal Etxean ere

Hurrengo hitzorduak Sinaloa estatuko Mazatlan hirira eraman zuen egilea, joan den ekainaren 6ean. Hiri honetan euskal ondarea oso nabarmena da, historikoki euskal familia asko bizi izan direlako bertan. Ekitaldia Ángela Peralta Antzokian egin zen eta bertan Ruiz de Gordejuelak era bizi eta erakargarrian azaldu zituen bere liburuaren nondik-norakoak. Berarekin batera aritu ziren Carmina Ramírez, Universidad Iberoamericanako katedratikoa, eta Luis Antonio Martínez Peña, Sinaloako Universidad Autónoma-ko Historia katedratikoa. Azken honek hiriko XIX. mendeko euskaldunen historia ekarri zuen gogora, batez ere Echeguren familiaren pasarteak. Familia hau garaiko garrantzitsuenetako izan zen eta Mazatlango industria, portu eta merkataritzan zeresan handia izan zuen. Azken aurkezpena atzo bertan izan zen, Mexiko DFko Euskal Etxean.

Lotura interesgarriak

Mexikoko Euskal Etxea
www.centrovascomexico.com

Vascosmexico-ren webgunea
www.vascosmexico.com