Jasone Euskal Etxeak liburua aurkeztuko du gaur Asuncion-en Garay familiaren Paraguairekiko ekarpenaz

2013/05/17

Gaur arratsaldean Paraguaiko Asuncion hiriburuan, bertakoe euskal etxearen eskutik aurkeztuko den Garay familiari buruzko Raul Amaralen liburuaren azala

PUBLIZITATEA

Historiaren Paraguaiko Akademiak 'Garaytarrak Kultura Paraguaitarrean' liburua, Raul Amaralek idatzia, baitaratuko du gaur arratsaldean Asuncion hiriburuan, bertako Jasone Euskal Etxeak antolaturik. Hector Izaguirre lehendakari duen euskal etxeak gonbidapena luzatu nahi izan die bere bazkide eta lagunei, eta oro har interesa izan dezakeen publikoari aurkezpen ekitaldira bertara daitezen, EuskalKultura.com-i azaldu dionez.

Asuncion, Paraguai. Asunciongo Jasone Euskal Etxeak Raul Amaralek idatzitako "Los Garay en la Cultura Paraguaya" (Garaytarrak Kultura Paraguaitarrean) liburua aurkeztuko du gaur ostirala, maiatzaren 17an, arratsaldeko zazpi t'erdietan, Historiaren Paraguaiko Akademian, erakunde honek Andres Barbero kalearen 230.ean, Artigas ondoan, daukan egoitzan.

Asunciongo euskal elkarteak bat egiten du liburu eta aurkezpen honekin euskaldunek eta euskal ondorengoek herrialde honetan iraganean eta gaur egungo bizitzan ere utzitako arrasto eta ekarpenak ikertu, bildu eta zabaltzearen alde daraman bidearekin, kasu honetan gainera Garaytarrak bezala "gure herrialdeari ekarpen neurtezina egin dion" familia garrantzitsu honen historia libururatuz.

Ekitaldia Asunciongo Euskal Etxea-Casa Vasca de Asuncion delakoak 2013rako ezarri duen kultur plangintzaren baitan behar da kokatu.

Gogora ekar dezagun Paraguaiko hiriburuko euskal etxeak egin berria duela maiatzaren 3an elkartearen Urteko Ohiko Batzarra, bertan lehendakari berretsirik Hector Izaguirre, eta lehendakariorde gisa Esddy Irigoitia, aurreko lehendakariorde Arturo Sasiainek kargua osasun arazoak medio utzi ondoren.

-Bertaratzeko asmoa baduzu, baitetsi mesedez 0992280570ra deituz edo emaila bidaliz euskalejasone@ymail.com helbidera