euskalkultura.eus

Boise, AEB. Azaroaren 16an, larunbatean, urteko lehen elurtearekin batera egin zen Ipar Ameriketako umeen euskara irakasleen 3. ikastaroa Boiseko Euskal Museoan. Itxaso Cayero izan zen irakaslea eta berak idatzi duen "Umeen Euskara Liburua" izan zen mintegiaren ardatza. Ipar Ameriketako txikien irakasleen lana erraztea da lan honen helburua eta bertan euskara klaseak dinamizatzeko kantuak eta jolasak biltzen dira.

Mintegian Cayerok irakasleei materiala aurkeztu zien eta, bertan dauden kanta eta jolasak ezagutzeaz gain, eurekin jolasean ibili ziren. "Oso ikastaro dinamikoa izan zen eta irakasleek ikasleen errola hartu zuten egun batez umeentzako jolasetan parte hartuz", azaldu du Izaskun Kortazar NABOko Euskera koordinatzaileak.

Ikastaroetan erabiliko

Liburua oso praktikoa da eta klaseak antolatzeko azalpen zehatzak ematen ditu: ariketa bakoitza egiteko behar den materiala, iraupena, interneteko baliabide gehigarriak, gramatika azalpenak, ariketak egiteko beste modu batzuk, etxerako ariketak...

Aurten Ipar Ameriketako umeen irakasleek klaseetan erabiliko dute Itxaso Cayeroren liburua. Horrela, datorren urtean egingo den Umeen Egunean AEBetako hiri eta bazter desberdinetako txikiek abesti eta jolas berberak partekatu ahal izango dituzte.