Itxaso Cayero eta Aitor Iñarrak jasoko dute Izaskun Kortazarren lekukoa NABO Euskara teknikari gisa

2013/11/28

Astero NABOren astekaria da. Gaur goizean eman du argitara euskara koordinatzaileen izenen berri

PUBLIZITATEA

Teknikari berria hautatzeko elkarrizketa eta prozedurak bukaturik, NABO Ipar Ameriketako euskal elkarteen batasunak erabakia hartu du eta Itxaso Cayero (Boisetik) eta Aitor Iñarra (San Frantziskotik) izango dira NABOko Euskara alorreko teknikari berriak, Martin Goicoecheak segitzen duela alor horretako arduradun (Euskara chairperson). Hala eman du gaur aditzera NABOk Astero bere astekariaren bidez. Biak eskarmentudunak dira euskararen alorrean eta lekukoa hartuko diote Izaskun Kortazarri urtarrilaren lehenean.

San Frantzisko, Estatu Batuak. NABOko New Yorkeko bileran erabaki legez, horretarako propio hazitako Euskara Batzorde batek hartu du bere gain euskara teknikari berria hautatzeko prozesua. Behar da gogoratu, posizio edo lanpostu hau sortu zenetik NABOren baitan, Eusko Jaurlaritzatik etorritako sostenguari esker, Izaskun Kortazar izan dela lan hori zerotik hasi eta koordinatu izan duena, eta euskara irakasle bilbotarrak duela hilabete batzuk adierazi zuela urte honekin batera ardura hori beste norbaiti pasatzeko asmoa.

Izaskunekin batera, eta orain arte bere laguntzaile zebilen Itxaso Cayero boisetarra izan da lan horretan segitzeko hautatutako bi pertsonetako bat. Buruetako bat Boisen, eta bestea San Frantziskon, Itxasorekin batera Aitor Iñarra gizon polifazetikoa izan baita NABOk euskara alorrean garatzen duen eskola eta ikastaro programaren ardura hartzeko hautatutako bigarren pertsona.

Urtea bukatu artean Izaskun Kortazarrek jarraituko du postuan, esaterako gainean ditugun Euskararen Nazioarteko Eguneko (ENE) ekitaldiei dagokienez. Eta urtarrilaren 1ean sartuko dira bi arduradun berriak, lekuko-hartze arras ordenatuan. Izaskun Kortazarrek lan emankorra, dinamikoa eta berritzailea egin du azken urteotan eta, zorionak eman eta agiantza onenak bidaltzen dizkiogula, ongi-etorria ematen diegu euren ardura edo egoera berrian Itxaso eta Aitorri. Zorterik onena lerro hauetatik!

-NABOren euskara webgunea: www.naboeuskaraz.com
-Euskara NABO webgune nagusian: www.nabasque.org/euskara.htm
-Astero da NABOren astekariaren izena: www.nabasque.org/astero.htm