euskalkultura.eus

Berlin, Alemania. Iragan asteburuan egin den Euskal Koreografoen Berlingo 2. Jaialdia "oso arrakastatsua" izan da, Ainhoa Añorgak, Berlingo Euskal Etxeko presidenteak, EuskalKultura.com-i aitortu dionez. Jaialdiaren sustatzailea den Mikel Aristegi koreografoa eta berari laguntzen egon diren Euskal Etxeko kideak ere "oso pozik" geratu dira lortutako harrerarekin.

Jaialdiak Europan segida izango du, eta Aristeguik EuskalKultura.com-i iragarri dionez datorren urtean Londresen ere Euskal Koreografoen Jaialdia egingo da. "Berlinen, hurrengoa 2013an izango da. Hemen bi urtean behin eta tarteko urtean Europako hiri batean egitea da ideia. Nire asmoa apurka apurka Europan sare bat osatzea da, euskal koreografoek euren lana behar den moduan aurkezteko aukera izan dezaten", adierazi digu Aristeguik.

Bertsoak dantzan

Jaialdia iragan ostiralean, abenduaren 9an hasi zen eta hiru egunetan zehar Berlingo publikoak gaur egun Euskal Herrian egiten den dantzaren "lagin txiki bat" ezagutzeko aukera izan du, antolatzaileen esanetan. Dantzaz gain, beste arteak ere jorratu ditu jaialdiak eta elkarrekin uztartuz sorkuntza une ederrak bizi izan dira taulagainean. "Literatura eta poesia irakurketak, dantza inprobisazio eta musikarekin batera izan dira, oso irakurketa bereziak eta paregabeak sortuz", azaldu du Añorgak.

Horren eredu izan zen jaialdian"primizian" Mikel Aristeguik proposatu zuen jokoa: "Bertsolari - Dantzalari" konzeptua. "Bertsolari bakoitzak dantzari bat zuten bere alboan, berak botatako bertsoaren inprobisazioa eginez". "Aldi berean, Euskal Etxeko kide diren Nagorek eta Lourdesek, ezinezkotzat jotzen genuena egin zuten: bertsoak bota ahala itzuli eta pantaila batean alemanera itzulita idaztea. Euskaraz ez zekitenek bertsoak zuzenean alemanez jarraitu ahal izan zituzten!", azpimarratu du Añorgak.

[Berlingo Cervantes Institutuan egin zen aurkezpenean, jaialdiaren antolatzaile eta babesleetako batzuk,  ezkerretik eskuinera: Aizpea Goenaga (Etxepare Institutuko zuzendaria), Gloria Minguez ( Espainiako enbaxadako kultur-sailburua), Ainhoa Añorga (Berlingo Euskal Etxeko presidentea), Elke Roloff (Art and Projecteko antolatzailea) eta Pantxoa Etchegoin (Euskal Kultur Erakunde zuzendaria) (argazkia Volker Roloff)]

Itsasoa Berlinera

Guztira zazpi konpainiak parte hartu dute jaialdian "zein baino zein interesgarriagoak, denak bereziak eta desberdinak". Partehartzaileen zerrenda eta lanak, hemen.

Aurkeztutako lanek jaialdiaren gai nagusiak proposatutako ideiari erantzun zioten --"Euskaldunak ozeanoari begira" zen gaia-- eta itsasoa Berlinera apur bat ekartzea lortu zuten. Ildo horretatik jo zuten ere Berlinen aurkeztu zituzten bi dokumentalak: "Apaizac Obeto", Ternuako euskaldunen bidaiei buruzkoa; eta "Modernist Basque Surfing".

Horrez gain, hiru egunetan ikusgai izan den argi eta doinu erakusketa baten bidez antolakuntzak itsasoa sentitzeko eta gozatzeko aukera luzatu die ikusleei.