euskalkultura.eus

Buenos Aires, Argentina. Ostiralean abiatu zen Argentinako hainbat puntutan sanferminen bertako segimendu eta ospakizuna eta datorren asteburura arte luzatuko dira Hego Amerikako herrialde honetako hainbat euskal eta nafar etxeren eskutik. Iruñean ez bezala, hotza ikaragarria izan da latitude hauetako jaien ezaugarri nagusia; horrek ez ditu, hala ere, sanferminzaleak batere kikildu eta eguraldia gorabehera bat egin dute ordu hauetan Iruñeko kaleak betetzen ari diren milaka lagunekin.

[General Rodriguez herriko Eusko Aterpea euskal etxean ‘San Fermin Mus Txapelketa’ jokatu zen joan den igandean. Valentek eta Riverok osatutakoa izan zen bikote txapelduna. Bigarren, hirugarren eta laugarren postuetan, berriz, Sosa-Marcos, Lucero-Leonardi eta Ponce-Etcheverry, hurrenez hurren (argazkiaEE)]

[La Platako Euzko Etxean asteburu osoko programari ekin zitzaion. Motorrak berotzen hasteko, "Eneko Aritza I. Errege Baskoina" izenburuko hitzaldia eskaini zuen Luis Luquezek uztailaren 4an. Larunbatean, ordea, Xare nola jokatu erakutsi zuten Santiago Gramajo, Iñaki Gil Najera, Alan Correa, Nicolas Zanabria, Mikel Gil Najera eta Andoni Etcheverry pilotariek. Azkenik, igande goizean meza eta bazkaria izan zituzten laplatatarrek. Jaia txupinazoarekin hasi eta dantzekin luzatu zen arratsaldean zehar. Zuzeneko musika ere egon zen, Aire Aire Trikitixa Taldeko Amaiur Alkain trikitilariari esker. La Platako alkate Pablo Bruera ere bertaratu zen festara eta udalaren laguntza agindu zuen Euzko Etxeak azaroan egingo duen 2014ko Euskal Argentinar Aste Nazionalerako. San Fermin-en omenezko egitarauarekin jarraitzeko, aste honetan Entzierro dokumentala proiektatuko dute etxekoek egoitzako areto nagusian. Hitzordua uztailaren 10ean da, arratsaldeko 5:30etan (argazkiakEE)]

[Maipuko euskal etxera ere iritsi ziren sanferminak. Anaitasuna-koek elizkizunak antolatu zituzten igande goizean eta arratsaldean askaria eta zinea eskaini zizkieten instituziora bertaratu zirenei. Mezan San Fermin santuaren estatuatxoa tronuratu zuten Maipuko euskal gizataldeko kideek (argazkiakEE)]

[Andeen magalean, Mendozako Denak Bat-ek 130 bat lagun bildu zituen sanferminak ospatzeko. Iruindarrek bezala, cuyotarrek ere izan zituzten txupinazoa eta zezenak; hemengoak, ordea, kartoizkoak, baina haur eta helduek gustura korritu zuten euren aurrean (argazkiakEE)]

[Mendozan ere baina Nafar Etxean, jaia uztailaren 6an izan zen. Festari hasiera emateko, Alma Navarra koruak abestu zuen eta horren ostean prozesioan sartu ziren kideak aretora, santuaren irudia eramanez. Segidan, abesbatzak abesti nafarrak eta argentinarrak kantatu zituen, dantzari helduek dantzatzen zuten bitartean. Dantza flamenkoak eta Nafarroako koreografia tipikoak ere taularatu zituzten edade guztietako dantzariek. Urtero bezala, buruhandi eta zezenek ez zuten jaia galdu nahi izan (argazkiak NE)]

[Pergaminoko Lagun Onak ere izan zen jaia ospatu zuen lehenetako bat. Pasa den larunbatean egin zuen, Arrecifeseko eta Buenos Aireseko lagunak partaide (argazkiakEE)]