Iker Gonzalez chef donostiarrak Euskal Sukaldaritza Jaialdia inauguratuko du gaur Asuncionen

2013/07/25

Iker Gonzalez Ayerbe chef donostiarrak Euskal Sukaldaritza Jaialdi bat eskainiko du gaurtik aurrera eta abuztuaren 3a bitartean Paraguaiko hiriburuko Sheraton hotelean. Bertako euskal etxearekin adostuta, inguruko euskaldunek gaur izango dute euren eguna.

PUBLIZITATEA

Hiriburu paraguaitarreko Sheraton hotelak Euskal Sukaldaritza Jaialdi bat baitaratuko du gaurtik aurrera eta abuztuaren 3a bitartean, bigarrez urtez segidan berau antolatzeko gonbidatu dutrelarik Iker Gonzalez Ayerbe chef donostiarra, iaz Asuncionen euskal sukalde moldeen aurkezpen orokorra eginez aurkeztu zuen jaiak lortu zuen arrakasta kari. Euskal sukaldaritza tradizionala lantzen duen Iker Gonzalez chefa Donostiako Maria Cristina hoteleko sukaldeburua da eta EuskalKultura.com-i azaldu dionez, pintxo barra itzelarekin batera honako platerak prestatuko ditu, besteak beste: Marmitako, Porrusalda, Zurrukutuna, Bakailaoa Pil-pil erara, Legatza saltsan, Arrainzopa, Txipiroiak Pelaio erara, Pantxineta, Intxaursaltsa... Asunciongo Euskal Etxeak gaurko eguna ezarri du euren kide eta lagunen bilgarri.

Asuncion, Paraguai. Paraguaiko euskaldunek --eurekin batera euskal sukaldaritza maite dutenek eta gastronomizaleak oro-- aukera aparta izango dute uztailaren 25etik abuztuaren 3a bitartean Euskal Sukaldaritzaren plater esanguratsuenak dastatzeko Asunciondik mugitu gabe --Mendia ez badoa Mahomaregana, Mahomak joan behar mendira, esango luke beste harek--; eta ekimeneko chef protagonista den Iker Gonzalezek EuskalKultura.com-i adierazi dionez, ez omen da nolanahiko aukera izango, ahalegin berezia egina baitute bai lehen-gai aldetik zein aurkezpen eta taxuketa aldetik, emaitza ahalik eta onena eta fidelena izan dadin, "Euskal Herrian bezala"koa izan dadin, kontuan izanik batzuetan ez dela aise Euskal Herririk hain urrun material batzuk topatzea. Baina "datozenak pozik irtengo direla uste dugu", adierazi digu apal antzean donostiarrak.

Euskal sukaldaritza molde tradizionala lantzen du sukalde lanetan ibilbide luze eta adierazgarria duen Ikerrek. Munduan barrena ibilia da, beste sukaldaritza tradizio eta moldeak ezagutzen, eta euskal sukaldaritzaren ordezkari izana da hamaika lekutan New Yorketik Buenos Airesera, tartean Gabon-go Librevillen, Kataluniako Bartzelonan, Errusiako Moskun edo Tailandiako Bangkoken, beste hainbat hiri eta herrialderen artean.

Honakoa Paraguaira datorren bigarren aldia da, iaz Sheratonen bertan izan baitzen, lehenengo Euskal Sukaldaritza Jaialdi baten arduradun. Izan ere, lortutako arrakastagatik ekarri dute aurten ere. Aukera honetan, koordinatu ahal izan du bertako Euskal Etxearekin, eta gaurko eguna, esaterako inguruko euskaldunen bilgarri ere izango da, Asunciongo Jasone Euskal Etxeak iragarri duenez, bere kideek, jakina, euren gisa gainerako egunetan ere ager badaitezke ere.

Hitzordua, gaur arratsaldeko 8:30etan Asunciongo Sheraton hotelean; eta oro har, uztailaren 25etik abuztuaren 3a bitartean, egunero, tenore horretan, buffet gisa.

-Iker Gonzalez Ayerne chefari, Asunciongo iazko aurkezpena dela-eta egindako elkarrizketa interesgarria, hemen: http://10000maneras.blogspot.com.es/2012/05/entrevista-al-chef-iker-gonzalez-ayerbe.html