Hemen zaude: Hasiera Albisteak Alurr taldea Issoire-ra abiatuko da, Munduko Musiken eta Dantzen Folklore Jaialdian parte hartzeko

Alurr taldea Issoire-ra abiatuko da, Munduko Musiken eta Dantzen Folklore Jaialdian parte hartzeko

2009/07/13

Ibarra herri gipuzkoarreko Alurr Dantza Taldea, Okzitaniako Issoire herrian bihartik aurrera eta datorren igandera arte egingo den Munduko Musiken eta Dantzen Nazioarteko Folklore Jaialdian parte hartuko du. Ibarrako 12-16 urte bitarteko gaztetxoek euskal dantza tradizionalak eskainiko dituzte bertan, baita tradizioan oinarritutako koreografia berri batzuk ere, azken hauek antolakuntzakoek bereziki eskatuta. Eli Nosella taldeko arduradunak EuskalKultura.com-i adierazi dionez, zalantzarik ez du 'esperientzia polita eta aberasgarria izango dela taldearentzat'.

Donostia-San Sebastián. Uztailaren 14tik 19ra bitartean egingo da Okzitaniako Issoire herrian, Frantzia erdialdean, Munduko Musiken eta Dantzen Nazioarteko Folklore Jaialdia. Euskal dantza talde bat izango da bertan, Ibarrako Alurr taldea. Guztira 12-16 urte bitarteko 17 dantzarik parte hartuko dute eta sei musikarik, esan nahi baita trikitixa, kaxa, bateria, txistua eta panderoek osatutako taldea. 'Hauen lana bereziki eskertu behar da, musutruke etorriko direlako, eta benetan lan asko izango dute', dio Eli Nosellas-ek. Guztira, Ibarratik 28 lagun abiatuko dira Issoire herrira.

Folklore jaialdia izanik, Alurr Dantza Taldeak dantza tradizionalak aurkeztuko ditu baina baita koreografia batzuk ere, antolatzaileek hala eskatuta. 'Interneten gure koreografiak ikusi zituzten, gustatu eta jaialdira joateko deitu ziguten'. Taldearentzat ezustekoa izan zen gonbidapena, aldi berean ilusio handiz jasoa. 'Aurretik Kroazian edota Alemanian beste taldeekin egon garenean, beti lagun edo ezagunen baten harremanak medio joan izan gara, jaialdi hauen dinamika hori izaten baita; baina honetan gure bila etorri dira eta hori poztekoa da'. 

Euskaldunekin batera Kenia, Haiti, Paraguai, Salomon Uharteak, Serbia eta Eslovakiako taldeak arituko dira, besteak beste, Musiken eta Dantzen Nazioarteko jaialdi honetan. Alurr Dantza Taldeko gaztetxoentzat interesgarria da jaialdian parte hartzea, dantzari eta musikarientzat aukera polita baita. 'Taldeko denak ilusioz beterik gaude, gaztetxoak bereziki, gisa horretako beren lehenengo esperientzia izango baita'. 'Euskal dantzak erakusteko parada izango dugu, eta baita beste kulturengandik ikasteko ere', azaltzen du Eli Nosellas-ek. Bere esanetan, 'gure kultura zabaltzeko aukera eskaintzen digu, gure herria ezagutarazteko, harremanak sendotzeko, ikasteko eta disfrutatzeko'. Jaialdiko erakustaldiak herrian kokatutako zenbait gunetan izango dira, 'batean ordu bete, hurrengoan hogei minutu; azkenean, egunean zehar dantza asko egin beharko da, horregatik gure errepertorio osoa prestatu dugu'. Dantza taldetik dena primeran ateratzeko moduan prestatu dute; beraz, orain guztia pentsatu bezala ateratzea eta ahalik eta gehien probestea falta zaie. Etzi izango dute euren lehenengo emanaldi osoa (ikus programa loturetan).

-Jaialdiari buruzko programa eta xehetasunak: www.festival-issoire.fr
-Taldeari buruzko informazio gehiago: www.alurr.com

Komentarioa gehitu

Komentario bat gehitu zenezake formularioa betata

(Beharrezkoa)
Esaiguzu zure izena
(Beharrezkoa)
(Derrigorrezkoa)
(Derrigorrezkoa)
(Beharrezkoa)
Erantzun galderari aurrera jarraitzeko:

Zenbat dira hiru gehi bi? (idatzi zenbakiekin)

Alurr taldea Issoire-ra abiatuko da, Munduko Musiken eta Dantzen Folklore Jaialdian parte hartzeko

Issoireko Munduko Musiken eta Dantzen Nazioarteko Folklore jaialdian izango diren dantzarietako batzuk

E-postaz harpidetu albisteetara

bisita