euskalkultura.eus

Mexiko Hiria, Mexiko. Mexikoko baztandar komunitateak urtero urtero lortzen du lagun andana biltzea bere sorterriaren eguna ospatzeko egiten duten festara. Sustraiekin harreman oso estua dute Mexikon bizi --eta jaio eta bizi diren-- baztandar ugariek eta ilusioz eta gogoz beterik jo eta su aritzen dira beti Baztango Eguneko festa hau antolatzen. Aurten ere antolatzaileek lan eskerga egin zuten, beti umore onez eta alai, eta festara bildu zirenekin partekatu zuten giro bikain hori.

Festa ordu biak aldera abiatu zen eta apurka apurka Euskal Etxera bildu joan ziren lagunak Txokotik pasa ziren, bertan apiritiboa egiteko. Antolatzaileen esanetan, berrehun bat lagun izan ziren euskal etxean, talde baztandar antolatzaileak prestatu zuen bazkari gozoa dastatzeko irrikitan.

Menua, Baztango jaki eta plater tipikoek osatua zen: Baztan zopak, Piperrada, Arkumea txilindron erara, Azpizuna zainzuri saltsarekin eta Sagar tarta bainilla izozkiarekin.

[Jo eta ke bazkaria prestatzen Mexikoko Euskal Etxean (argazkia MexikoEE)]

Giroa ederra izan zen eta txiki, gazte zein helduak gustura ibili ziren. Bazkalostean batzuk musean jokatzen aritu bitartean, beste batzuk solasean segitu zuten, aspaldiko lagunak agurtzen, eta gutxi batzuk dantza egitera ausartu ziren.

[Euskal Etxeko frontoia bete egin zen bazkariko mahaiekin (argazkia MexikoEE)]

[Gazte asko bildu ziren bazkari eta festara (argazkia MexikoEE)]

[Dantzan ere aritu ziren zenbait, bazkalostean (argazkia MexicoEE)]

Argazki eta bideo gehiago, Mexikoko Euskal Etxearen facebook orrian.