euskalkultura.eus

 Emaitza aldekoa izateak ere asko lagundu zuen eta txalo artean hartu zituzten euskaldunen golak: Etxeberria (2), Aduriz (1) eta Gabilondo (1).

Hurrengo egunean, ostegunean, Euskadiko jokalari eta teknikariek bisita egin zuten Eusko Etxera eta errekia afaldu zuten bazkideekin. Bisitaldiak interesez bizia sortu zuen Caracaseko euskal komunitateko kideen artean eta gazte zein nagusi, gizon zein emakume asko bertaratu ziren, euskal futbolariei autografoak eskatu eta eurekin argazkiak ateratzeko asmoarekin, Eusko Etxeko zuzendari Pedro Javier Arriagak BasqueHeritage.com-i azaldu dionez. ‘Partidari buruz galdetu zieten, euren taldeek ligan egindako denboraldia komentatu eta euskal taldeen postuak eta Errealaren jaitsierari buruz aritu ziren’, aipatzen du Arriagak.

Ekitaldian Eusko Jaurlaritzako Kirol eta Kultura sailburuordea, Gurutz Larrañaga; eta Euskadiko Futbol Federazioko lehendakari Iñaki Dobaran izan ziren, selekzioko teknikari eta jokalariekin batera. Aurresku batekin hartu zituzten bisitariak Eusko Etxean. Amaya Olalde, Iker Urcelai eta Ander Azpiritxaga izan ziren dantzariak eta Koldo Olaldek txistua eta danbolina jo zituen. [Ezkerreko irudian partida ikusteko Eusko Etxean bildu zen jendearen giroa (argazkiaCaracasEE)]

Gurutz Larrañaga eta Iñaki Dobaranek ‘Caracasen egon eta etxean bezala sentitzea ohore bat’ zela esan zuten eta euskal selekzioaren opariak eman zizkieten Eusko Etxeko arduradunei: Euskal Futbol Federazioaren ezkutu bat, selekzioaren elastikoa eta futbol baloi bat. Eusko Etxeko lehendakari Pedro Arriagak Venezuelako Euskal Etxeen Federazioaren plaka oroigarri bat eman zien. Gaua giro ederrean igaro zen eta jokalari zein teknikariak oso lagunkoiak izan ziren bertan bildutako zaletuekin. Gainera, jokalari batzuk Eusko Etxeko txikiekin futbol partida bat egin zuten futbito zelaian, gaztetxoek ahaztuko ez duten gau ederra borobilduz.

Caracaseko Eusko Etxea, Venezuela

Valencia-Caraboboko Eusko Etxea, Venezuela

Pantaila erraldoia Eusko Etxean Euskadi-Venezuela partida ikusteko