euskalkultura.eus

Erroma, Italia. Bihar bukatuko da Erroman Associazione Culturale Euskarak (ACE) eta UPTER unibertsitateko Euskara Sailak antolatu duten "@roma basco-euskara" jaialdia. Urtero egiten dute elkarte hauek euskal kultura erakusketa abenduan, baina astebeteko ekimen bezala jaio zena hiru asteko jaialdi bihurtu da jada.

Jaialdia azken txanpan sartuko da gaur, Baffo della Gioconda aretoan egingo den poesia eta musika ikuskizunarekin. "Intermezzi/Tarteak" izena du gaualdiak eta bertan ariko dira Xabier Montoia musikari eta idazlea, David Santoro poeta italiarra, Mursego kantari eta jotzaile eibartarra eta Ibon Rodriguez musikaria,  euskal eta italiar testuei musika jarriz. Bihar jaialdiaren itxiera jaian kontzertua emango dute Il Cantiere gunean Xabier Montoiak, Mursegok eta Ibon Rodriguezek, Banda Jorona talde erromatarrak lagunduta.

Bertsolariak eta poetak

Aste hauetan zehar jaialdiak arlo askotako artistak bildu ditu Erromara, eta hauen arteko lankidetzatik ekitaldi oso bereziak sortu dira. Horietako bat izan zen, adibidez, abenduaren 1ean Laurie Amat estatubatuarrak eta Ckoroma taldeak eman zuten kontzertua. Kaliforniarrak musika elektronikoarekin inprobisatzen du eta CKoroma euskaraz kantatzen duen talde euskal-italiarra da. Abenduaren 3an Myriam Aizager zuzendari hendaiarra izan zen Erroman, "Ni Nuzu, Mur(s)" dokumentala aurkezten.

Beste ekitaldi deigarri bat "Bertsolari/Poeti" mahai ingurua izan zen, abenduaren 9an. Bertan bapatekotasunari eta bertsolaritzari buruz hausnarketa egin zuten Jon Sarasua bertsolari eta soziolinguistak, Giampiero Giamogant poetak eta Serena Salvatori etnomusikologoak. Ondoren Asier Altunaren "Bertsolari" dokumentalaren emanaldia egin zen, italierazko azpitituluekin (ACEko bazkideek egin zuten itzulpen lanari esker).

"Bertsolari/Poeti" ekitaldiaren une bat:

Pintxo!

Iragan larunbatean, berriz, jaialdiak gastronomia eta poesia uztartu zituen, Dome Rock Cafè tabernan egin zen "Pintxo!" ekitaldiarekin. Asier Oyarzabal sukaldari donostiarrak pintxoak prestatu zituen, eta pintxo horiei buruz bertsoak jarri zituzten Donato De Acutis, Giampiero Giamogante, Matteo Mencattini eta Jon Sarasua euskaldunak (azken honek euskaraz, euskal erara, eta aurrekoek italiar tradizioari segika).

[Pintxo aukera zabala, bertso eta ardo artean dastatzeko (argazkia Euskara.it)]

Informazio gehiago eta irudiak, Euskara.it Facebook taldean, hemen.