euskalkultura.eus

General Las Heras, Argentina. Negua izan arren, ekainaren 22an arratsaldeko 7etan euskal etxekoek urteroko tradizio bete zuten eta San Juan eta San Pedro ospatu zuten Athletic Club Sportsmen-en egin zuten jaiarekin. Zortziak aldera, kalejira hasi zen kalean eta beranduago, iluntzean, bertako euskal dantza taldekoek eta Cañuelaseko euskal etxekoek buruhaundien artean dantza egin zuten, Amaren Plazaraino. Urtero bezala, Sorgina trenaren galponean itxoiten zegoen. Erreketaren momentuan, dantzariek bere inguruan, aurreskua, sorgin dantza eta beste dantza batzuk egin zituzten.

Club Sportsmens-eko kiroldegian 200 lagun elkartu ziren afari bero batekin indarrak berreskuratzeko. 60eko hamarkadako apaingarriak zeuden kiroldegian, euskal etxeko bazkide Taverna arrebek utzitakoak. Mahaikideei ongi etorria emateko, Donostiako Danborrada jo zuten. Afarian zehar, Iturri Zaharreko Ur Berriko dantzariek eta Cañuelaseko Denak Bat taldeak euskal dantzekin girotu zuten ospakizuna.

[Danborrada General Las Heraseko Sportsmen kluban]

Danborrada ez zen nobedade bakarra izan, sei euskaldun-herenensei sariak banatu baitzizkieten:  Dolli Irigoyen chef-ari, Raúl Ithurburu Las Heraseko Campo de Pato General fundatzaileari; Alejando Yaveneri (sei aldiz Olimpia de Plata eta Abierto Argentino con la Rosa y Negra sariaren irabazle, 1990an); Martín Salaverryri, 10 aldiz Olimpia de Plata eta Nicolas Tavernari, 2 aldiz Olimpia de Plata. Azkenik, Facundo Kennedy Salaberryri, euskaldun jatorriko kirolari gazteari.

Suaren gainetik salto Mexikon

Bestalde, ekainaren 22an Mexikoko euskal etxean afari bat antolatu zen, ohiko San Juan suarekin. Urtero legez, ondoren ausartenek suaren gainetik salto egiteko tradizioa bete zuten. 

[Euskal Etxeko bazkideak suaren inguruan Mexikon]

Euskal etxe hauez gain beste batzuk ere San Juan ospakizuna egin zuten: Chivilcoy eta General Rocakoak, Argentinan; Naguanagua eta Caracasekoa, Venezuelan; Elkokoa (Estatu Batuetan) eta Madrilen (Espainia).