euskalkultura.eus

Alta Gracia, Argentina. Otsailaren 1ean hasita, bihar arte luzatuko da Cordoba probintziako 'Mundu Guztia Alta Gracian' izeneko kolektibitateen jaia. Ekitaldiaren 27. edizio honetan, eta urtero bezala, Argentina bertako folklorea, mendeetan zehar Argentinara iritsi ziren etorkinen kulturekin nahastuko da, izen handiko talde eta artistak lagun.

Sei koreografia aurkeztuko dituzte gaur gauean Cordobatarrak taldeko kideek Aletxu Lamayer zuzendari, ekitaldiko bi agertokietan. Axera makil, Azken dantza, Urratsak, Arku Mistoak, Fandango eta Arin Arin dantzekin, euskal presentzia bermatuko dute Gure Txokoa-ko neska-mutilek hamabost urtez jarraian, Argentinako Gizataldeen Festa handienetako bat den honetan. Ikuskizuna gaueko 10etan hasiko da, tren geltokiaren esparruan.

Lan, jai eta ospakizun handiko urtea

Hasi berria den urteak aktibitate handiko egunak ekarriko dizkie Gure Txokoa-ko dantzariei. Alde batetik, material berria ari dira prestatzen laster euren www.purevolume.com/Cordobatarrak web orrian zintzilikatzeko. Honekin lotuta, ideiaren sortzaileetakoa izan zen Aletxu Lamayer-ek proiektua martxa onean dabilela adierazi digu: “Oso denbora laburrean –gogora dezagun azaroan jarri zela abian– sei mila inguru erreprodukzio, zazpi mila deskarga eta hamar milatik gora bisita izan ditugu. Ez dago batere gaizki. Sareratuko dugun hurrengo materiala ‘Jauzi’ batzuk batzen dituen album bat izango da. Dena ondo baldin badoa datorren astelehenean egongo da eskuragai”.

Horretaz gain, otsailaren amaieran topaketak eta dirua eskuratzeko beste hainbat ekintza hasiko dira antolatzen Cordobatarrak taldeko lagunak, Cañuelaseko Dantzarien VIII. Topaketan parte hartu ahal izateko. Etorkizunari begira ere, beste zeregin batzuk izango dituzte euskal etxeko gazteek 2014 honen zehar. 60. urtemuga ospatuko du aurten Gure Txokoa erakundeak eta dantzariak ospakizunen erakarpen handienetako bat izango dira ohi bezala. Urteurrenaren egitaraua laster plazaratuko dela jakinarazi digute instituziotik.