euskalkultura.eus

Boise, AEB. Lau urte dira ekimena abiatu zela eta geroztik ekain-uztailean Boise eta Gasteiz arteko ikasle mugimendu hau egon da, gasteiztarrak Boisera, esperientzia estatubatuarra izateko, Bishop Kelly institutuko ikasleen etxeetan egonik; eta ondoren bigarren partea, ikasle boisetarrak Gasteiza, Olabide Ikastolako euren kide euskaldunen eskutik, euren familien etxeetan abegikortuta. Bigarren kasuan, gainera, Gasteizko Andra Mari Zuriaren jaiak tarteko.

[Olabideko hamar gazteen taldea Boiseko alkate Dave Bieter-ekin]

Aurtengoan hamar dira Boisera bidaiatutako ikasleak, "orain arteko kopuru altuena", esan digute Olabiden. "Batxi 1ekoak dira eta hiru astez egongo dira bertako Bishop Kelly ikastetxeko familietan. Ondoren, uztailaren erdi aldetik aurrera, bertakoak izango dira Olabideko familien artean". 

Esperientzia interesgarri eta aberasgarria izan da orain artean Boise eta Gasteiz arteko truke hau, urtero eta baita aurten ere. Lehenengo aste honetan nabaria da ikasle partaideen gogoa eta poza Boisen egotearren. Eguneroko martxan familiekin badaude ere, egiten dituzte aktibitateak elkarrekin eta horietako batean, Dave Bieter Boiseko alkateak errezibitu ditu. Jakina denez, jatorri euskaldunekoa da Bieter eta euskaraduna. Bera ere ibili zen ikasle Euskal Herrian haurra zela, ez trukean, eskola arruntean baizik, bere guraso eta anai-arrebekin batera Oñatin bizi zela, bertako ikastolan ikasle.