euskalkultura.eus

Buenos Aires, Argentina. Saladillo, Azul, Laprida, Pehuajo, Las Flores, Ayacucho, Jose C. Paz, Pergamino eta San Nicolas herri argentinarretako euskal etxeak bisitatu dituzte 'Que par che' konpainia euskal argentinarreko kideek urritik abendura arte. Epe honetan, lau Barreterapia tailer, hiru Clown tailer, eta “Los Pardos” eta “Soltarlo al aire” antzezlanen bost emanaldi eskaini dituzte Buenos Aires probintziako publikoaren aurrean. Beste alde batetik, eta euskal etxeetan egindako emanaldiez aparte, euren kabuz ere aurkeztu dira Maite Guevara eta Mariano di Franco, Buenos Airesen eta Rosarion.

[Ayacuchoko Euskal Odolak antolaturik eskoletako umeentzako emanaldia eskaini zuten Maitek eta Marianok, herriko Kultur Etxean. Irudian “Soltarlo al aire” lanaren eszena bat]

“Tailerretan 90 partaide izatera heldu izan gara, Azul-en esate baterako. Euskal etxeek asko lagundu digute hedapena egitera eta arrakasta haiei ere zor diegu, ahalegin handia egiten baitute kultura zabaltzeko. Izan ere, gure bisitaren berri irrati, telebista eta egunkari askotan islatzen lagundu digute”, azaldu dio Maite Guevara euskaldunak EuskalKultura.com-i. Bere esanetan, “orain, bira bukatuta, esan dezaket euskal etxekoekin sortutako harremana sendoa izan dela oso, eta badakigula Argentinara bueltatuz gero lan berriak egiteko aukera izango dugula”.

[Pehuajoko Etxe Alai euskal etxean Barreterapia Tailerra egun zuten artistek (argazkia EE)]

“Euskal etxekoen giroa gustatu zaigu. Lan handia egiten dute, batzuek beste batzuek baino gehiago eta, nire ustez, ez da arrazoi ekonomikoa soilik. Jendearen adinaren kontua ere bada.  Oso interesgarria da Euskal Herriko kultura nola mantentzen duten ikustea, gure dantzak, gure musika… Jendeak bere arbasoei buruz hitz egiten du, arbasoen jaioterriez… Kasu batzuetan bertatik bertara ezagutu gabe baina aiton-amonek kontatutakoa gogoan… Hala ere, zaila egiten zait oraindik, bizi izandako guztiaz mintzatzea… agian denbora apur bat beharko nuke, etxeratu ondoren akaso, biraren balantze sakona egiteko. Bai esan dezaket asko ikasi dudala eta oso polita iruditu zaidala nortasuna nola mantendu eta aldi berean nola egokitu ahal izan zuten euskal argentinarrek. Eta euskal jatorririk ez dutenek gure kultura nola bereganatu zuten. Horrek RH faktoreak baino gehiago balio du”.

[Saladilloko Itxaropen euskal etxean ere lagun anitz bildu ziren barre egiten ikasteko klasean (argazkia EE)]

[Jose C. Paz-en, “Los Pardos” antzezlana aurkeztu zuten (argazkia EE)]

“Azpimarratzeko beste gauza bat euskal etxe batzuek egiten duten gizarte-lana da. Baliabide guztiak baliatzen dira beharrean edo kale gorrian bizi direnak laguntzeko, premiazko gauzekin, eta kultura eta bestelako baliabideak ere hurbilduz”, azaldu digu 'Que par che' konpainiako emakumeak.