euskalkultura.eus

Habana, Kuba. Zinkunegiren hitzaldiak hogeita hamar bat lagun bildu zituen, nahikoak indarra emateko gaur egun euskal etxea kudeatzen duen talde berriari hasitako bidearen egokitasunean. Izan ere, munduko euskal etxerik zaharrenetakoa den AVNB edo Asociación Vasco-Navarra de Beneficencia delakoak, hainbat urtez geldirik edo abiada handirik gabe egon ostean, hasia da mugitzen azkeneko bi urte hauetan, egun lehendakari duen Renato Garcia Eguzquiza eta bere taldearen bultzadaz.

Bultzada horietan dago euskara eskolei indar berria emateko asmoa. Kinku Zinkunegiren hitzaldiak, beraz, euskara Euskadin eta munduan gaitzat harturik, interes berezia piztu zuen hainbat jenderengan. Garcia Eguzquiza berak EuskalKultura.com-i esandakoaren arabera, entzule agertutako hogeita hamar lagunen artean, gehienak elkartekoak ziren eta euskara klaseetan interesa agertu dutenetakoak.

Hitzadiaren ostean entzundako iruzkinengatik, agerian geratu zen bertan aipatutakoa berria zela entzuleentzat eta intersez segitu zutela Zinkunegiren jarduna. "Oso hitzaldi ona, datu interesgarri askorekin" edo "lan ederra garatzen du Eusko Jaurlaritzak HABEren Euskara Munduan programarekin" izan ziren bertaratutakoen esaldietako batzuk.

"2012ko irailean euskara eskolak hasi genituen. Orain, bisita honekin eta HABEren laguntzarekin, gure irakaslea prestatzen-eta, zalantzarik ez daukat klaseak bizkortu eta sendotuko ditugula. Nire uistez argi dago hainbeste jende etorri izana gaur bezalako eguraldia zeukan egunean eta futboleko mundu-txapelketa ere hor egonik adierazgaria dela eta adierazten duela, hain zuzen, badagoela hemen jakinmina eta interesa gure ama hizkuntza ezagutu eta ikasteko", laburbildu du Habanako euskal etxeko lehendakariak.