euskalkultura.eus

Chascomus, Argentina. Lau urteko egitarauari jarraituz, uztailaren 19tik 26ra izango da aurten Euskara Munduan programako Hego Amerikako 2014ko Neguko Barnetegia. Aurrekoetan bezala, laugarren elkarretaratze honetan ere lau herrialdetako euskal etxetako ordezkariak batu dira, honela banatuta:

-Argentina (Arrecifes, Azul, Buenos Aires, Chascomus, Cordoba, Jose C. Paz, Mar del Plata, Necochea, San Nicolas, Santa Rosa, Tandil, Villa Maria eta Tres Arroyos)
-Brasil (Sao Pablo)
-Txile (Santiago eta Valparaiso)
-Uruguai (Montevideo eta Salto)

[Nahiz eta on line plataforman taldea bakarra izan, aurrez aurreko eskolak ahalik eta gehien aprobetxatu ahal izateko, bi taldetan daude banatuta ikasleak]

[On line ikastaroko ikasgaietan oinarrituta, mintzamena lantzen da batez ere klaseetan]

Klaseak goizez 9etatik 11:00etara eta 11:30etatik ordu batera dira; eta arratsaldez, 6:00etatik 7:00etara (bakarkako lana) eta 7:30etatik, 9:00etara, Chascomuseko Sarmiento Liburutegian. Otorduak, herrian itzal handia duen Club de Pelota-n (Pilota Elkartea). Irakasleei dagokienez, programaren arduradun Kinku Zinkunegirekin batera on line ikastaroko irakasle arduradun Dani Oiarbide eta Gabriela Mendia eta Sabrina Otegui irakasle argentinarrak dira eskolen arduradunak.

[FEVAko Zuzendaritza Batzordeko kideak ikasleen harrera egile]

Barnetegiaren hasierarekin batera, FEVAren bilera ere egin zen Chascomusen iragan larunbat goizean. Bilkura bukatzean, Hugo Andiazabal lehendakariak ongietorria eman zien ikasle/irakasleei eta esker beroak eman zizkien euskara ikas/irakasteko egiten duten ahaleginagatik.

Larunbat eguerditik aurrera, formakuntza programan trebatu diren irakasleen talde bat bilduko da euskararen eta euskararen irakaskuntzaren inguruko burutazioak partekatzeko. Beste hainbat gai jorratzeaz gain klase esperientzia arrakastatsuak eta irakaste metodoak hobetzako ildoak  mahai-gaineratuko dituzte irakasle argentinarrek.