Euskal Venezuelarren 19. Topaketaren deialdia egin dute: apirilaren 12an izango da, Galdakaon

2014/03/25

2013ko Euskal Venezuelar Topaketa oso jendetsua izan zen (argazkia EuskalKultura.com)

PUBLIZITATEA

Euskal Herriko euskal-venezuelarrek hitzordua dute aurten ere apirilean, talde honen bilgune nagusi bihurtu den topaketan. Hemeretzigarrena izango da aurtengoa, eta Venezuelako euskal Diasporako lagun taldeak gero eta harreman estuagoa du. Batzuk Euskal Herritik hara joandako --eta gero itzulitako-- euskaldunak dira; beste zenbait Venezuelan jaiotako euskaldunen seme-alabak. Denek ala denek lotura estua mantentzen dute herrialde harekin eta bilera honetan aspaldiko lagunak agurtzeko eta hango kontuak gogoratzeko aukera izaten dute. Aurten, gainera, Venezuelako egoera dela eta, ekitaldi bereziren bat egitea hausnartzen ari dira taldekoak.

Bilbao, Bizkaia. Egun Euskal Herrian bizi diren Venezuelako diasporako kideak elkarrekin bildu eta adiskideak agurtzeko aukera izango dute datorren apirilaren 12an, 19. Euskal Venezuelar Topaketan. Urtero urtero ehun lagundik gora bildu ohi dira hitzordura, Euskal Herria eta Venezuelako euskaldunen arteko harreman estua sustatzen duen zubilana eginez.

Aurten, antolatzaileek aditzera eman dutenez, topaketaren lekua aldatuko da. "Gure Venezuela maitearen egoera dela eta, egin genezakeen omenaldirik onena venezuelar erako bazkaria egitea zela pentsatu dugu", esan dute antolatzaileek. Hori dela eta bazkaria Venezuelako famili batek zuzentzen duen Galdakaoko jatetxe batean egingo da. Herriaren erdi-erdian dago jatetxea eta kokapena oso egokia dela gehitu dute antolatzaileek.

Hitzordua eguerdian hasiko da, urtean zehar hil diren lagunei eskainitako meza elizkizunarekin (erabakitzeke dago ze elizatan egingo den meza), eta ondoren, arratsaldeko hiruak aldera, bazkaria. Menua honakoa izango da: arepitak gazte eta gurinarekin, enpanadilla, galeper arrautzak saltsa arrosarekin eta "tequeño"-ekin; urdaiazkikoa labean erreta oilo entsalada eta urdaiazpiko ogiarekin, eta postrea: gazta; edariak eta kafea barne. Prezioa 26 euro.

Data gainean dela eta, antolatzaileek lehenbailehen erreseba egiteko eskatzen dute. Horretarako idatzi e-maila honako helbide hauetara:

-aldatze@euskalnet.net

-pamayaz@gmail.com
-AMAYA.ZENARUTZABEITIAPIKATZA@osakidetza.net

Mezuan argi esan nortzuk joango diren, izen eta abizenekin, zerrenda ondo osatu ahal izateko.