'Euskal sushi-a' edo patata tortilaren bertsio asiarra Shanghaiko Euskal Etxeko kideek asmatuta

2011/03/29

'Euskal Sushi', Shanghaiko 1go Tortilla Lehiaketaren errezeta irabazlea (argazkia ShanghaiEE)

PUBLIZITATEA

Shanghaiko Euskal Etxea osatzen duten bazkide gehienak Txinan lana dela eta bizi diren gazte euskaldunak dira, eta gazte izate hori da agian elkartearen jarduera original eta alaien giltzarria. Euskal etxe honetan patata tortila txapelketa tipiko arrunta euskal eta asiar gastronomiaren arteko fusio bitxia bihurtzen da. Ikus bestela argazkiko 'euskal sushi-a. Azken hilabeteetan euskal etxean egin dituzten beste ekitaldi berezi horietako bat martxoaren 19an egin zuten squash txapelketa izan zen. Elkartearen blogean sareratu dituzte jarraian jaso ditugun irudiak.

Shanghai, Txina. Shanghaiko Euskal Etxeak bere ekitaldien argazkiak sareratu ditu bere blogean, bertan izandako giro bikaina erakusteko. Azken ekitaldia joan den martxoaren 19an egin zuten squash txapelketa izan zen. Partidak One Park Avenueko kantxan jokatu zituzten txapelketan parte hartu zuten hamar jokalarik. Samuel Sevillano izan zen norgehiagokako garaile, finalean Alberto Garciari irabazi eta gero.

Shanghai Campeonato Squash 2011

[Shanghai-ko Euskal Etxearen squash txapelketako partaideak txaloka eta finalistak sariekin (argazkia ShanghaiEE)]

Arrakasta handia izan zuen beste jarduera orijinal bat Shanghaiko 1go Tortilla Lehiaketa izan zen, martxoaren 12an. 18 tortilla aurkeztu zituzten kideek eta lagun asko bildu ziren euskal etxearen egoitzara, tortillak epaitu eta, batez ere, dastatzeko irrikaz.

Tortilla orijinalaren saria, Garazi Azkuek eta Mireia Gezuragak asmatu zuten 'Euskal Sushi' errezetak jaso zuen, sukaldaritza euskaldun eta asiarraren arteko fusio bitxia berau. Tortilla tradizional onenaren saria, Xabi Coronadok eta Fagorreko lankideek egin zuten 'Udalaitz' tortillak jaso zuen.

Shanghai Campeonato Tortilla de Patatas 2011 (2)