Euskal sukaldariak mundura: Daniel Lopez donostiarra Japonian da eta Eneko Atxa San Frantziskora joango da

2014/03/21

Daniel Lopez sukaldaria Donostiako Kanpanario kalean, Kokotxa jatetxearen parean (argazkia restaurantekokotxa.com)

PUBLIZITATEA

Arrakasta eta ospea du euskal sukaldaritzak nazioartean, eta hori dela eta euskal sukaldariak munduan barrena ibiltzen ohituak daude, euren lana beste herrialdeetan erakusteko. Egunotan, esaterako, Japonian da Daniel Lopez donostiarra (Kokotxa jatetxea), Fukuoka hiriko Gourmet City 2014 jaialdian parte hartzen. Maiatzean, aldiz, San Frantziskon izango da Eneko Atxa bizkaitarra, Azurmendi jatetxeko burua (hiru Michelin izarduna). Atxak bi afari berezi prestatuko ditu Los Gatoseko Manresa jatetxean.

Donostia-San Sebastián. Aste honetan Japonian da Daniel Lopez sukaldari donostiarra, Fukuoka hiriko Gourmet City 2014 sukaldaritza jaialdian parte hartzen. Japonia hegoaldeko hiri eta eskualde honetan gastronomiak eta kalitatezko produktuak oso aintzat hartzen dituzte eta sukaldaritza tradizioa handia dago.

Jaialdiaren baitan Daniel Lopezek afari berezi bat prestatuko du, gaur bertan, beste bi sukaldariekin elkarlanean: Uwe Opocensky alemaniarra (Hong Kong-eko Mandarin Oriental Hotelekoa) eta Shunji Isoyama japoniarra, Fukuokako Nishitetsu Grand Hotelekoa. Lopezek bere euskal ikutu berezia ekarriko dio afari honi. Donostiarraren jatetxeak, Kokotxak, Michelin gida ospatsuko izar bat du.

Eneko Atxa San Frantziskora

Bestalde, euskal gastronomiako izar berri nagusienetako bat, Eneko Atxa bizkaitarra, San Frantziskon izango da maiatzean. Atxak bi afari berezi prestatuko ditu Los Gastoseko Manresa jatetxean, bertako David Kinch sukaldaraiarekin elkarlanean, Euskal Kazeta egunkari estatubatuarrak aditzera eman duenez.

Atxaren jatetxeak, Azurmendik, Michelin gidako hiru izar ditu, eta bere ezaugarrietako bat da osagai freskoak eta bertakoak darabiltzala, asko eta asko jatetxeko baratzean bertan hazitakoak.

San Frantziskoko afariak maiatzaren 17 eta 18an egingo dira.