euskalkultura.eus

Madril, Espainia. Etxepare Euskal Institutuak aditzera eman duenez, datozen egunetan euskal literaturak leku nabarmena izango du Madrilgo kultur-agendan. Madrilgo Liburu Azokaren baitan egingo da aurreneko ekitaldia, asteazken honetan, Etxepare eta Euskadiko Editoreen Elkarteak antolatuta: itzulpengintzari buruzko mahaingurua egingo dute Josu Zabaleta itzultzaileak, Karlos Cid, itzultzaile eta Konplutense unibertsitateko irakasleak eta Karmele Jaio eta Rikardo Arregi idazleek. 

Bigarren jarduera ekainaren 9an egingo da, Matadero Madril Kulturguneko "Casa del Lector" aretoan, Bertan Xabier Paya bertsolari eta itzultzaileak “Antología Oral Vasca-Euskal ahozko literaturaren Antologia-Anthology of Basque oral literature” liburua aurkeztuko du. Etxepare Institutuak hiru hizkuntzatan argitaratu duen lan honek euskal ahozko literatura aztertzen du, genero desberdinetan sakonduz. 

Solasaldi honetan Payarekin batera izango da Asier Altuna zinemagilea. Altunak "Bertsolari" dokumentala zuzendu zuen 2011n eta euskal kulturan jarraitzaile andana duen ahozko arte honi buruz ariko da. Mari Jose Olaziregi, Etxepareko Euskararen Zabalpenerako zuzendaria moderatzaile izango da.

Amaitzeko, ekainaren 9 eta 10ean Asier Altunaren “Bertsolari” dokumentala emango da ikusgai Matadero Madrid Kulturguneko Cineteca-n. Zuzendaria bertan izango da filma aurkezteko eta emanaldiaren ostean ikusleen galderei erantzuteko.