euskalkultura.eus

Buenos Aires, Argentina. Buenos Airesko Euskal Echea Eskolako kapera berriro ere izango da aurten Kontzertu Klasikoen Zikloaren egoitza. Emanaldiak joan den maiatzaren 14an hasi dira, Mario Videla organo-jolearen errezitalarekin, eta aste honetan, ekainaren 11an, jarraituko dute, nobedade batekin.

‘Amerikako Händel’ gisa ezagutzen den Manuel de Sumaya musikagile mexikarraren Argentinan inoiz jo gabeko hainbat pieza aurkeztuko ditu La rosa púrpura del Plata izeneko taldeak etzi, ekaineko kontzertuan, horien artean: Si ya a aquella nave, Como aunque culpa, Pescador soberano eta Ya la naturaleza redimida, batzuk aipatzearren. Gogora dezagun Manuel de Sumaya (1680-1755) Mexikoko Katedraleko musika kaperako maisua Katedraleko musikagile eta organo jotzaile nagusia izan zela urteetan. Bere lanak islatzen du Espainiako eragin eremuan zegoen estilo aniztasuna da.  

La rosa púrpura del Plata taldeari dagokionez, Gabriel Schebor zuzendaritzapean, Errenazimendu eta Barrokoko musikan adituak diren Pablo Travaglino tenorra, Martha Cosattini eta Cecilia Carnero biolin jotzaileak, Gabriel Schebor tiorba jotzailea eta Ana Paula Segurola organo-jotzailea dauzka partaide. Jardunbide oparoko taldeak esperientzia handia du Hego Amerikako Errenazimendu eta Barrokoko errrepertorioa jotzen eta Argentina mailan ez ezik, nazioarteko musikaldietan eta aurkeztu izan da, besteak beste, Uruguai, Alemania, Ingalaterra eta Holandako musika aretotan. Astearteko emanaldian, gainera, kontzertuaren aurretik maisuek hitzaldi argigarri bat eskainiko diote publikoari.

Hona datozen emanaldietako egitaraua:

-Irailaren 11an, Lagun Onak Abesbatza (Miguel Pesce zuzendari), Jose Maria Gutierrez txistulari, eta organoa
-Urriaren 8an,  Elena Deanna sopranoa eta Maria Cristina Deanna organo jotzailea
-Azaroaren 12an, hiriburuko eta Llavallolgo Euskal Echea Eskoletako Abesbatzen kontzertua Matias Sagreras organo jotzaileak lagunduta