euskalkultura.eus

Iruñea-Pamplona. Euskara Kultur Elkargoak Udalbideren laguntzarekin kaleratutako mapa honetan udalerri guztietan euskaraz matrikulatuta dauden ikasleen portzentaia agertzen da. Horrekin batera, mapa honek erakusten du euskarak berak lurralde guztietan duen egoera juridikoa. Nolabait, XXI. mendearen hasiera honetan, euskarazko hezkuntzak duen egoeraren begirada orokor eta esanguratsua eskaintzen du argitalpenak.

Mapa egiteko herriz herri hizkuntza eredu bakoitzaren indarra eta joera neurtu da eta horretarako, matrikulazio datuak udalerrika hartu dira hiru kasutan izan ezik, Ipar Euskal Herrian, Iruñerrian eta Trebiñun, hauetan eskualdeka egin baita neurketa.

Mapa jaisteko moduan eskuragai dago Euskal Kultur Elkargoaren web orrialdean. Kopia inprimatuak, berriz, Karrikiri Euskaldendan, Elkar, Abarzuza eta Auzolan liburudendetan topa daitezke. Neurriari dagokionez, argitalpenak 59 x 42 zentimetro ditu eta diseinua bereziki zaindu da, antzinako kartografia gogoaraziz. 1.000 ale argitaratu dira eta, iazko azken egunetan, banatzen hasi zitzaien, besteak beste, euskararen garapenaren inguruan lanean ari diren gizarte eragileei, Nafarroako ikastetxeei eta beste Autonomia Erkidegoetako, Europako eta mundu osoko aditu eta erakundeei.

-Eskura ezazu mapa hemen