euskalkultura.eus

Santa Barbara, AEB. Kaliforniako Santa Barbara Unibertsitateak iragan astean egin zuen Comparative Iberian Studies mintegiaren baitan euskal gaiak ere jorratu zituzten, arlo honetako literatura eta linguistikan sakontzearekin batera. Euskal Herritik etorria, Etxepare Euskal Institutuko Euskara Sustatzeko Zuzendaria, Mari Jose Olaziregi, hizlari gonbidatu gisara aritu zen eta “Iberian Studies Within/Beyond the Peninsula: The Current Situation and Desiderata” hitzaldia eman zuen. Besteak beste, iberiar penintsulan bertan iberiar ikasketek duten hedadurarik eza AEBetan duen arrakastarekin kontrajarri zuen Olaziregik hitzaldian.

Horrez gain, euskal gaiei eskainitako atal berezian, txostenak aurkeztu zituzten Unai Nafarratek, UCSBn masterra egiten diharduen ikasleak, eta Diana Palenzuela Etxepare Euskal Institutuak UCSBn duen lektoreak. Nafarretek “Negotiation Coolness, Aligning with Media Personality in a Basque Radio Station” gaia izan zuen hizpide, eta Palenzuelak, aldiz, “Retos y obstáculos de la educación bilingüe en el País Vasco” izenekoa.

Kongresuaren itxierarako, Noka taldeak kantaldia eskaini zuen, Etxepare Euskal Institutuak aditzera eman duenez. UCSBko Department of Spanish and Portuguese delakoak antolatu zuen sinposioa, Silvia Bermudez saileko buruaren gidaritzapean eta Viola Miglio Barandiaran Katedra buruaren laguntzarekin.