euskalkultura.eus

euskal diaspora eta kultura

Albisteak rss

Euskadiko Filmategiak etxean filme zaharrak dituztenei artxibo hauek dohaintzan uzteko gonbitea egin die

2008/06/12

Euskadiko Filmategiak zaharberritu duen 'Gente de Mar' filma
Euskadiko Filmategiak zaharberritu duen 'Gente de Mar' filma

PUBLIZITATEA

Euskadiko Filmategiko zuzendariak, Mikel Arregik, Euskal Herriko eta Diasporako euskaldunei dei egin die interes historiko edo antropologikoa izan dezaketen famili filme zaharrak erakunde honetara bidali ditzaten. Filmategiak ondare hau jaso eta kontserbatu egingo du, baina filmeen jabetza emaileena izango da. Gainera materiala digitalizatu, egoera txarrean dauden filmak hobetu eta jabeei DVD kopia bat helaraziko die Filmategiak. Ezkontza, jaunartze, famili-bilkura eta jaiak garai desberdinetan euskaldunen bizimodua nolakoa zen jakiteko informazio iturri paregabeak izan daitezke, eta Filmategiak ondare hori bildu eta gordetzeko konpromezua hartu du.

Donostia-San Sebastian. Euskadiko Filmategiak 2007 urteko oroitidazkia aurkeztu zuen atzo, Gurutz Larrañaga Eusko Jaurlaritzako Kultura, Gazteria eta Kirol sailburuordeak, eta Mikel Arregi Euskadiko Filmategiko zuzendari-gerenteak eman zuten prentsaurrekoan. Iazko jardueraren balioespena baikorra egin zuten, Filmategiaren funtsek dagoeneko formato desberdinetako bost milioi metro zinta baino gehiago biltzen dituztela azpimarratuz. 2007an soilik, 167 laburmetrai, bi erdi-metrai eta 185 luzemetrai jaso zituen Filmategiak.

Filmategiak dei berezia luzatu zien Euskal Herriko eta Diasporako euskaldunei, etxean jasotako filme zaharrak erakundera bidali eta ondare historiko honen kontserbazioan laguntzeko gonbitea eginez. Nahiz eta jai edo ekitaldi pribatuak izan, askotan filme hauek euskaldunen bizitzari buruzko informazio historiko eta antropologiko garrantzitsua gordetzen dute. ‘Grabazio horiei esker jakin dezakegu nolakoa zen Euskal Herria garai haietan, nola janzten ziren, nolakoak ziren euren jaiak, kaleak, kotxeak... , azaldu zuen Arregik. ‘Gainera, sarri kamara aprobetxatu eta familiaren irudiez gain herriko ekitaldiak ere grabatzen ziren, eta dokumentu historikoak aurkitu izan ditugu filme batzuetan’.

Digitalizazioa eta zaharberritzea

Filmategiak grabazio hauek digitalizatu egingo ditu eta jabeei DVD kopiak emango dizkie, jatorrizko materiala bertan gordeko delarik. Izan ere, funtsen digitalizazio prozesu garrantzitsua egiten ari da erakundeak, eta iaz 400 orduko artxibo historiko dokumentala digitalizatu zuten. Aurten beste hainbeste egitea espero dute arduradunek.

2007ko jardueren artean Filmategiak bi zaharberritze ere azpimarratu zituen. Lehena Policarpo Fernández Azkoaga jaunaren Bilbao? (1960) filmarena izan da. Bizkaiko hiriburuko txabolei buruzko dokumentu hunkigarria da eta egun Guggenheim museoa dagoen lekuan bertan. Beste zaharberritzea digitalki egin da. Kolorearen degradazioa zela eta, Gente de mar (Carlos de los Llanos, 1957) film laburra salbatzeko behar larria zegoen. Filmak hogei minutu irauten du, eta Donostian egindako antxoaren arrantzari buruzko dokumentala da.

Informazio gehiago:

Euskadiko Filmategia-Filmoteca Vasca

Sancho El Sabio 17 E
Donostia-San Sebastián 10017
Tel: (34) 943 468484
Faxa: (34) 943 469998
E-maila: filmoteca@filmotecavasca.com


LOTURA INTERESGARRIAK

Euskadiko Filmategia-Filmoteca Vasca
www.filmotecavasca.com


« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia