euskalkultura.eus

euskal diaspora eta kultura

Albisteak rss

Euskadin da Texas-ko Rafael Anchia euskal jatorriko hautetsia eta hitzaldia eskainiko du gaur eguerdian Bilbon

2010/03/25

Rafael Anchia abokatua eta Texasko Ordezkarien Ganberako kide da. Hitzaldia gaurko eguerdi t'erdietan emango du Bilboko Merkataritza Ganberan, Rekalde Zumardia 50 helbidean
Rafael Anchia abokatua eta Texasko Ordezkarien Ganberako kide da. Hitzaldia gaurko eguerdi t'erdietan emango du Bilboko Merkataritza Ganberan, Rekalde Zumardia 50 helbidean

PUBLIZITATEA

Aurretik ere aipatua dugu EuskalKultura.com-eko orrialdeotan, 41 urteko abokatu eta politikari demokrata hau, aitama euskaldunen semea, etorkizun oparoa izan dezakeen hautetsia baita. 2004tik Texas Estatuko Ordezkarien Ganberako (Kongresua) kide da, bi alabaren aita (Sofia eta Maia) eta iaz bertan, 'Urteko legelaria' hautatu zuten estatuan, Ordezkari Ganberan egindako bere legegile lana goraipatzearren. Obamazale handia, energia berriztagarrien aldeko apustua partekatzen du presidentearekin. Eta izan ere horri buruz, eneria berriztagarriez eta arlo horren Estatu Batuetan egun eskaintzen dituen garapen eta negozio aukerez mintzatuko da gaur eguerdi t'erdietan Bilbon, Euskadiko Energia Klusterrak antolatutako ekitaldian.

Bilbo, Bizkaia. 41 urteko abokatu hau 2004an hautatu zuten Texasko Ordezkarien Ganbarako kide. Aita markinarra dauka, Julio, pilotari ohia, eta ama ere, Edurne Mitxelena, euskalduna du, Mexikon jaioa aita eta ama euskaldunen alaba. Aita 1955ean sartu zen Estatu Batuetan Jai Alaian aritzera. Rafael Anchia Texasko gizatalde hispanoaren defendatzaile gisa gailendu da eta gaztetarik lan egin izan du talde honen alde, besteak beste lege sostengurik gabe zeuden atxilotu hispanoen alde. Bere izena aipatu izan da Dallasko alkatetzarako eta Texasko gobernadoretzarako hautagai izateko, nahiz eta bera demokrata den eta Texas, jakina denez, gehienbat errepublikanoen eremu.

Euskal jatorriko hautetsia finantza publiko eta korporatiboetan dago espezialdua eta bere karrera politikoan zehar goraipamen, sari eta errekonozimendu ugari bildu izan du garatu duen lan publikoarengatik. Hezkuntza gaietan ibili izan da eta baita ere ingurumenarekin, energia garbiekin eta eraginkortasun energetikoarekin zerikusia daukaten ekimenetan.

Bera entzuteko deia gaur ostegunerako da, Bilbon, eguerdiko hamabi t'erdietan, eta gonbidatua Euskadiko Energia Klusterreko presidenteak, Josu Jon Imazek, aurkeztuko du. Lekua, Merkataritza Ganbera, Rekalde Zumardia 50 (hirugarren solairua, 3.29 aretoa). Gaia, bere herrialdean energia garbiak garatzeko Obamarekin zabaltzen ari den aro eta garapenaldi berria.



« aurrekoa
hurrengoa »

Erlazionatutakoak

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia