euskalkultura.eus

Ontario, AEB. Eguraldia Ontarioko Euskal Etxearen San Migel jaia zapuzteko zorian izan zen irailaren 29an, egunean zehar euri erauntsi galantak izan zirelako. Halarik ere, elkarteko kideen umore onari esker festa ez zen bertan behera gelditu, inondik ere; eguraldi makurrari irribarre egin eta jai egun gogoangarriaz gozatu zuten Ontarioko euskaldunek. Saint Michael's Festival delakoaren aurreneko edizio hau ez dute berahala ahaztuko, baina datozen urteetan tradizioari eusteko asmoa agertu dute antolatzaileek.

Eguna prozesioarekin hasi zen eta elkarteko kideek euripean eraman zuten sainduaren irudia Ontarioko kaleetan barrena. Ondoren, parkean, elkarteko dantza taldeak egun honetarako sorturiko dantza aurkeztu zuen lehen aldiz. Taldeko kide Lisa Corcosteguik sortu du koreografia elkarte euskal-amerikar honetarako. Luke Barinaga gazteak San Migelen papera egin zuen eta, dantzaren unerik ikusgarrienean, beste dantzariek airean altxatu  zuten.

[Ontario Basque Club dantzariak eta, aurrean, San Migelen papera egin zuen Luke Barinaga gaztea (foto OntarioEE)]

Egunak euskal etxearen egoitzan egin zen lagunarteko bazkariarekin jarraitu zuen eta bazkalostean herri kirol txapelketak egin ziren parkean. Lehian, elkarteko gazteek euren indarra eta sasoia erakutsi zuten, eta, bai neskek, eta baita mutilek ere, lehiakortasun handia erakutsi zuten.

[Patty Miller, Boiseko Euskal Museoaren zuzendaria, panderoa jotzen eta Dan Ansotegui musikaria eskusoinuarekin, Ontarioko San Migel jaiaren bazkalondoa girotzen (argazkia OntarioEE)]

[

[Euskal etxeko gazteek gogotsu parte hartu zuten herri kirol txapelketetan (argazkia Ontario EE)]

[Kalakan taldeko kideak Ontarioko Euskal Etxean egin zuten emanaldian (argazkia OntarioEE)]

Festako argazki gehiago eta Kalakan taldearen emanaldiaren zenbait bideo, Ontarioko Euskal Etxearen Facebook orrian.