euskalkultura.eus

Buenos Aires, Argentina. Euskara mantendu eta zabaltzea da Euskaltzaleak-en helburu nagusia. 1944tik hona daramatza ekimen honetan Buenos Airesen eta bistan da lan emankorrean ari dela. Iraganeko buruhausteak gorabehera, oztopoak gainditu ahal izan ditu erakundeak eta gaur egun egoitza propioa izateaz gain euskal ekitaldien bultzatzaile sendo bat bihurtu da Argentinako hiriburuan. Euskara eskolak ez ezik, abesbatza, musika tailerrak, zine zikloa eta ostiraleko topaketak gauzatu ditu urtean zehar instituzioak. Eta etxetik kanpo ere mugitu da, gizataldeen jaietan, hainbat jardunalditan eta baita berak antolatutako Buenos Aireseko lehenengo Triki-Poteoan ere. ENE saria pozik egoteko arrazoi bat da, "baina batez ere beti bezala lan egiten jarraitzeko bultzada handia”, esan dute euskal etxeko agintariek bildu zituen 130 lagunekin aretoa bete zuen Euskararen Eguneko Jaian.

[Euskaltzaleak-en urte amaierako eta Euskararen Eguneko jaia Buenos Airesko Kataluniako 'Casal'en  burutu zen, joan den larunbatean. Programarekin hasteko Aurreskua dantzatu zuen jatorriz Arrecifeskoa izanik euskaltegiko dantza irakasle den Renzo Bustos-ek (argazkia EuskalKultura.com)]

[Ondoren, eta Eliseo Rodriguez-en zuzendaritzapean, Euskal Herriko kantutegiko klasiko batzuk abestu zituen Euskaltzaleak-eko abesbatzak, tartean, Eusko Gudariak, Txoriak Txori, Aldapeko, Donostiako Martxa (Ikus hemen), Ikusi Mendizaleak eta Agur Jaunak (argazkia EuskalKultura.com)]

[Abesbatzaren emanaldiari dantzarienak jarraitu zion. Renzo Bustos eta Estefania Abasolo irakasleen eskutik, Bob Espok, Fandango eta Arin Arin (ikus hemen) aurkeztu zituzten Euskaltzaleak-eko tailerreko dantzariek (argazkia EuskalKultura.com)]

[Musikarekin jarraituz, Euskaltzaleak-eko panderojoleak ere igo ziren tauletara. Ainhoa Iribar irakasle eta trikitilariarekin batera Hamabost-hamasei urte (ikus hemen) jo zuen taldeak (argazkia EuskalKultura.com)]

[Tailerretako aurkezpenak bukatutakoan, bideo instituzionala proiektatu zen. Irudien bidez euskaltegiaren 2013ko berriak, ekintzak, proiektuak eta lorpenak erakutsi zitzaizkion publikoari. Ondoren, lunch-a hartzeko momentua heldu zen. 130 lagun bildu ziren afarira, tartean Iparraldeko Euskal Etxeko, eta Cañuelas eta Gral Las Heraseko euskal etxeetako ordezkariak (argazkia EuskalKultura.com)]

[Jaiaren bigarren zatian, euskara taldeen aurkezpenak burutu ziren. Hasteko, lehenengo mailako ikasleek jolas bat proposatu zuten. Puxikei lotuta zeuden hitzekin abestien esaldiak sortu eta hitz bat osatu zuten partaideek: Independentzia (argazkia EuskalKultura.com)]

[Ondoren larunbatetako ikasleetako batzuek umorezko sketx bat egin zuten. (argazkia EuskalKultura.com)]

[Euskara eta Kultura tailerreko ikasleek euskal presoak ekarri zituzten jaira. Haien egoera zein den eta haiekin duten posta trukea aurkeztu zuten (argazkia EuskalKultura.com)]

[Buenos Airesko Versailles auzoan ere ematen ditu euskara klaseak Euskaltzaleak-ek. Kide batek astero ireki dizkio ateak taldeari eskualdeko lagunak bildu ahal izateko. Versailles-eko taldeak Aita Semea abestiaren bertsio bat kantatu zuen arpak lagunduta (argazkia EuskalKultura.com)]

[Jarraian, hirugarren urratseko taldeak bideo bat aurkeztu zuen… eta "Euskal Herriko jaietan neska-mutilak nolakoak diren" kontatu zuten (argazkia EuskalKultura.com)]

[Eta euskara ikasten hasi berri-berriak direnak ere animatu ziren ekitaldian parte hartzera. Haietako batzuk Urkoren Lehenengo ikasgaia abestiaren bertsio bat eskaini zuten taula gainean (argazkia EuskalKultura.com)]

[Hirugarren urratseko neskak euskararen itsasora atera ziren. Eta abesti batekin euskaldunen hizkuntza ikasteko gorabeherak adierazi zituzten (argazkia EuskalKultura.com)]

[Azkenik, eta ikasleen aurkezpenekin bukatzeko, mintza taldeko kideek bertsolaritza zer den azaldu... eta bertso batzuk bota zituzten (argazkia EuskalKultura.com)]

[Ikuskizuna Pai Mu Tan Jazz taldearen musikarekin amaitu zen. Jazz taldeak Ken Zazpiren 'Ilargia' pieza jo zuen beste batzuen artean (argazkia EuskalKultura.com)]

[Topa egiteko momentuan euren poza eta esker ona adierazi zieten Euskaltzaleak-ekoek bertara bildutako lagun guztiei. Zorionak! (argazkia EuskalKultura.com)]