euskalkultura.eus

euskal diaspora eta kultura

Albisteak rss

Ellis Island-eko euskal erakusketari AASLHren sarietako bat eman diote iragan ostiralean Estatu Batuetan

2011/09/20

Sarrera euskal erakusketara Ellis Island-en egon zenean (argazkia EuskalKultura.com)
Sarrera euskal erakusketara Ellis Island-en egon zenean (argazkia EuskalKultura.com)

PUBLIZITATEA

'Ellis Island-eko euskal erakusketa' bezala ezagutzen dute gehienek, New York ondoko irla horretan inauguratu baitzen 2010eko otsailean AEBetako euskaldunen berri ematen duen erakusketa hau. Boiseko Euskal Museoak Eusko Jaurlaritza lankide ekoitzia, 'Hidden in Plain Sight: the Basques' (Begibistan ezkutatuta. Euskaldunak) erakusketak Estatu Batuetako Estatu- eta Leku-Historiaren Elkarteak (AASLH ingelesezko sigletan) urtero banatzen dituen sarietako bat bereganatu du aurten. Michael Vogt, erakusketako arduradunak jaso zuen saria joan den ostiralean Virginiako Richmond herrian eginiko ekitaldian.

Richmond, Virginia, AEB. Erakusketa hau Boiseko Euskal Museo eta Kultura Etxeak orain artean antolatu dituen ekimen eta proposamen garrantzitsuenetako bat eta oihartzun aldetik handi eta anbiziotsuenetako bat da, izan ere Boisekoa eta Idahokoa ezezik Estatu Batuetako euskaldun guztien historia aipatzen baitu eta inauguratu ere Ellis Island-en inauguratu baitzen iazko otsailean, emigrazioari eta immigranteei dagokienez leku oso esanguratsu eta adierazgarria den horretan, XIX. eta XX. mendeetan Europatik otsasontziz Estatu Batuetan bizitza berri bat hasteko iristen ziren milioika jendeen sargune izan baitzen Ellis Island, egun estatubatuar diren askoren guraso, aiton-amona eta arbasoen hastapena Estatu Batuetan.

"Begibistan ezkutatuta. Euskaldunak", Boiseko Museoaren eta Eusko Jaurlaritzaren arteko elkarlanaren emaitza izan zen, eta bere garrantziaren arrazoietako bat euskaldunez euskal-amerikar komunitate bezala egiten duen aurkezpen orokorra da; bisita-txartel gisa aipatu izan dute, zazpi probintzietako euskaldunak euskaldun gisa aurkezten baititu, aurkezpen hori euren historia oso ondo ezagutzen ez duten euskal-amerikarren aurrean egina izanik edota publiko amerikar arruntaren aurrean.

Saria ematerakoan, AASLH elkarteak erakusketa osatzeko eginiko ahalegina eta euskal komunitateak bertara isuritako materiala eta gogoa aipatu du, euskaldunen kasuan gainera, Estatu Batuetako herri eta eskualde jakin batzuetan salbu euskaldunak, hor egonik ere, ez baitira oso ezagunak oro har, erakusketaren beraren izenak islatzen duen legez, begibistan egonik jende askok ez baititu identifikatzen, beharbada Europan errealitate nazional politikoki independentea osatzen ez dutelako, frantses eta espainiar errealitateek ezkutatuta.

-Erakusketaren webgunea: http://www.basqueexhibit.com



« aurrekoa
hurrengoa »

Erlazionatutakoak

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia